हेटौंडाः मकवानपुरको मकवानपुरगढी गाउँपालिका–१ मा एक युवतीको नग्न तस्वीर खिचेर ब्ल्याकमेल गरी निरन्तर यौनशोषण गर्ने सोही ठाउँका २४ वर्षीय युवा अझै फरार छन् । जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक लक्ष्मी भण्डारीले उनको खोजी कार्य भइरहेको बताउनुभयो ।
पीडित किशोरीले गएको बुधबार जिल्ला प्रहरी कार्यालय मकवानपुरमा जाहेरी दर्ता गरेकी थिइन् । तर युवा अझै पक्राउ पर्न सकेका छैनन् । युवकले ब्ल्याकमेल गरी यौनशोषण गरेको पीडितको आरोप छ ।
९ कक्षा पढ्दादेखि नै चिनेको युवकले गत बैशाखमा किशोरीको कोठामै गएर नग्न तस्वीर खिचेर ब्ल्याकमेल गर्न सुरु गरेको पीडितले प्रहरीमा दर्ता गरेको जाहेरीमा उल्लेख छ । ती युवकले किशोरीको फेसबुक आइडीसमेत लिएर किशोरीको नग्न तस्वीर राखेर यौनकर्मीको रुपमा प्रचारसमेत गरिदिएको पीडितको आरोप छ ।
