हेटौंडाः हेटौंडा उपमहानगरपालिकाको १० नम्बर वडा कार्यालयले आयोजना गरेको नृत्य प्रतियोगितामा वडा नम्बर ११ प्रथम भएको छ । हेटौंडा–१०, बसपार्कमा सोमबारबाट आयोजना गरेको घरेलु प्रदर्शनीअन्तर्गत् मंगलबार नृत्य प्रतियोगिता भएको हो ।
प्रतियोगितामा वडा नम्बर १० द्वितीय र वडा नम्बर १८ तृतीय भएका छन् । प्रथम, द्वितीय र तृतीय हुनेले क्रमशः ५० हजार, ३५ हजार र २० हजार रुपैयाँ पुरस्कार प्राप्त गरेका छन् । प्रतियोगितामा वडा नम्बर ८, २, १३ र ४ सान्त्वना हुन सफल भएको छ । सान्त्वना हुने ४ वटै वडाका सहभागीले ५ हजार रुपैयाँ प्राप्त गरेका छन् ।
हेटौंडा उपमहानगरपालिकाकी मेयर मीनाकुमारी लामाको प्रमुख आतिथ्य तथा वडा नम्बर १० का वडा अध्यक्ष फुर्वा दोर्जे लामाको सभाध्यक्षतामा पुरस्कार वितरण कार्यक्रम भएको थियो । पुरस्कार वितरण कार्यक्रमलाई सम्बोधन गर्नुहुँदै नगर प्रमुख लामाले प्रतियोगितामा सहभागी भएका सम्पूर्ण टिमलाई धन्यवाद व्यक्त गर्नुभयो । वडा अध्यक्ष लामाले विभिन्न संघसंस्थाबाट उपस्थित हुनेहरुलाई धन्यवाद व्यक्त गर्नुभयो ।
नेपालमा लुकेको संस्कृतिलाई जगाउने उद्देश्यले प्रतियोगिताको आयोजना गरेको वडा अध्यक्ष लामाले बताउनुभयो । कार्यक्रममा गैरसरकारी संस्था महासंघ बागमती प्रदेशका अध्यक्ष आरती पाठक, विभिन्न वडाका वडा अध्यक्षहरुलगायतको उपस्थिति रहेको थियो । प्रतियोगितामा १९ वटा वडाबाट प्रतियोगीहरु सहभागी भएका थिए ।
प्रदर्शनीमा ३५ वटा स्टल रहेको थियो । जडीबुटी व्यापारी राज बुढा क्षेत्रीले स्टलमा व्यापार ठिकै भएको बताउनुभयो । आर्थिक मन्दीको अवस्था भए पनि करिब १५ हजार रुपैयाँ लगानी गरेर व्यापार गरेको बताउनुभयो । उहाँले आयोजकको व्यवस्थापनमा कमी रहेको औंल्याउनुभयो ।
