हेटौंडाः मकवानपुर जिल्ला खेलकुद विकास समितिले आयोजना गर्न लागेको वृहत् खेलकुद तथा व्यापार महोत्सवमा १५ वटा खेल हुने भएको छ । यही पुुस ५ गतेदेखि १७ गतेसम्म आयोजना गर्न लागेको महोत्सवमा विभिन्न १५ वटा खेल सञ्चालन गर्ने निर्णय गरिएको हो ।
महोत्सव उद्घाटनकै दिन पुस ५ गते प्रभाकर पाण्डेको संयोजकत्वमा एथलेटिक्स खेल हुने भएको छ । सोही दिन सुनिल खड्कीको संयोजकत्वमा कराँते खेल हुने बताइएको छ । पुस ९ गते मकवानपुर जिल्ला तेक्वान्दो कार्यसमितिका सचिव बिक्रम लामिछानेको संयोजकत्वमा तेक्वान्दो खेल हुनेछ ।
केवल बानियाँको संयोजकत्वमा ब्याडमिन्टन खेल हुने बताइएको छ । विश्वनाथ पाठकको संयोजकत्वमा पुस ११ र १२ गते राष्ट्रियस्तरको उसु खेलको आयोजना गरिने निर्णय गरिएको छ । यस्तै, प्रकाश माझीको संयोजकत्वमा आइटीएफ हुनेछ भने आशीष थापाको संयोजकत्वमा फुटबल हुने भएको छ ।
सुनिल लोप्चनको संयोजकत्वमा रेस्लिङ, सन्तोष श्रेष्ठको संयोजकत्वमा भलिबल, मनोज शर्माको संयोजकत्वमा आठवटा नगरपालिकासहित अन्तरपालिका हक्की खेल आयोजना हुनेछ । अनिल दहालको संयोजकत्वमा बक्सिङ, किशोर श्रेष्ठको संयोजकत्वमा फुल कन्ट्रयाक्ट कराँते, सुमन नेपालीको संयोजकत्वमा कबड्डी र करन महत्रा क्षेत्रीको संयोजकत्वमा क्रिकेट आयोजना गरिने निर्णय गरिएको छ ।
महोत्सवबाट प्राप्त हुने रकम खेलकुद समितिमै राखेर खेल र खेलाडीको वृत्ति विकासमा लगाउने मकवानपुर जिल्ला खेलकुद विकास समितिका अध्यक्ष वेश खड्कीले जानकारी दिनुभयो । महोत्सवमा खेलकुदको स्पर्धासँगै कृषि, पर्यटन, हस्तकला, खेलकुद सामग्री, धार्मिक, सामुदायिक, स्वास्थ्य, जनचेतनामूलक र खानाखाजाका स्टलसमेत रहनेछन् । यस्तै, बालउद्यान, राष्ट्रिय तथा स्थानीय कलाकारको प्रस्तुति, खुला नृत्य प्रतियोगिता र लाइभ दोहोरीसमेत आयोजना हुने आयोजकले जानकारी दिएको छ । महोत्सवमा मकवानपुरमा क्रियाशील खेलकुदसँग सम्बन्धित सबै संघसंस्थाको प्रतिनिधित्व रहने बताइएको छ । महोत्सवमा विभिन्न कलाकारहरुले गायन, नृत्य, हास्यव्यङ्य प्रस्तुति गर्नेछन् ।
