हेटौंडाः कोरोना भाइरसको जोखिम न्यूनीकरण गर्न जिल्ला बाहिर तथा देश बाहिरबाट आएकालाई आवश्यकताअनुसार राख्न हेटौंडा उपमहानगरपालिकामा वडास्तरमै क्वारेन्टाइन निर्माण भइरहेको छ । नगरका १९ वटा वडामध्ये वडा नम्बर १२ र १३ मा क्वारेन्टाइन सञ्चालनमा आइसकेको छ भने वडा नम्बर ३, ८ र १५ मा पनि क्वारेन्टाइन निर्माणका लागि आवश्यक सामग्री पठाइसकिएको हेटौंडा उपमहानगरपालिकाकी उपमेयर मीनाकुमारी लामाले जानकारी दिनुभएको छ ।
उपमहानगरले ५० लाख रुपैयाँको कोष स्थापना गरी वडा वडामै क्वारेन्टाइन निर्माण गर्न सुरु गरेको हो । जेठ १९ गते वडा नम्बर १२ र १३ मा क्वारेन्टाइन निर्माण गरी सञ्चालनमा आइसकेको छ । यस्तै उपमहानगरपालिकाले हेटौंडा–१०, गोरक्षेश्वर मन्दिर परिसरमा पनि क्वारेन्टाइन सञ्चालनमा ल्याएको छ । गोरक्षेश्वरस्थित क्वारेन्टाइनमा जिल्लाका अन्य पालिकाका नागरिक आए पनि उनीहरुलाई सम्बन्धित पालिकाले जिम्मा लिएर लैजानुअघि बस्ने व्यवस्था मिलाएको छ ।
वडा स्तरमा क्वारेन्टाइन निर्माण गर्न लाग्दा कुनै कुनै वडामा स्थानीयले अवरोध समेत गर्न खोजेको खबर आइरहेको भन्दै उपमेयर मीनाकुमारी लामाले दुख व्यक्त गर्नुभएको छ । आफ्नै टोल, समुदायका दाजुभाई, दिदीबहिनी आउँदा सहज र सुरक्षित बसोबासको व्यवस्था मिलाएर आपसमा सौहाद्र्धता कायम गर्न समेत आग्रह गर्नुभएको छ । उपमहानगरपालिकाले आफ्ना नागरिकलाई सुरक्षित राख्न र सुरक्षित घर फिर्ता ल्याउन प्रयास गरिरहेकोले नागरिक तहबाट पनि साथ र सहयोग जरुरी रहेको उहाँले बताउनुभयो ।
