हेटौँडाः मकवानपुर जिल्ला फुटबल संघले नयाँ फुटबल क्लबबीच छनोट प्रतियोगिता आयोजना गर्ने भएको छ । जिल्लास्तरीय क्लबको मान्यता दिँदै जिल्ला लिग खेल्न पाउने गरी २ वटा क्लब छनोट गर्न प्रतियोगिता आयोजना गर्ने निर्णय गरिएको संघका महासचिव छवि सुवेदीले जानकारी दिनुभएको छ ।
नकआउट प्रणालीमा आयोजना हुने प्रतियोगिता आगामी मंसिर २३ गतेदेखि सुरु हुनेछ । मकवानपुर जिल्ला फुटबल संघको आइतबार बसेको बैठकले आगामी मंसिर २३ गतेदेखि प्रतियोगिता आयोजना गर्ने निर्णय गरेको महासचिव छवी सुवेदीले जानकारी दिनुभयो । प्रतियोगितामा १५ देखि २० वटा क्लब सहभागी हुन सक्ने अनुमान गरिएको उहाँको भनाइ छ ।
प्रतियोगितामा प्रथम र द्वितीय हुने दुइ टिम जिल्लास्तरीय टिमको रुपमा छनोट भई जिल्ला लिगमा समेत सहभागी हुनेछन् भने आगामी लिगमा दुई वटा टिम घटुवामा पर्ने बताइएको छ । संघमा २८ वटा क्लब दर्ता छन् । मकवानपुर जिल्ला फुटबल संघका सदस्य आलोक स्याङ्तानको संयोजकत्वमा प्रतियोगिता हुने महासचिव सुवेदीले जानकारी दिनुभएको छ । प्रतियोगिताको उपाधि विजेता र उपविजेताले सिल्ड, मेडल र ट्रफी प्राप्त गर्नेछन् ।
