हेटौंडाः अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले विद्यालयले लिने गरेको चर्काे शुल्क कम गर्न माग गर्दै हेटौंडा उपमहानगरपालिकालाई मागपत्र बुझाएको छ । शुक्रबार क्रान्तिकारी मकवानपुर जिल्ला अध्यक्ष सूर्य सी नेतृत्वमा हेटौैंडा उपमहानगरपालिकाकी प्रमुख मीनाकुमारी लामालाई मागपत्र बुझाएको हो ।
मागपत्रमा देशमा २०७२ सालको संविधान बनेपश्चात् संविधानमा व्यवस्था गरेको अनिवार्य र निःशुल्क शिक्षा पनि राज्यले पूर्णरुपमा लागू नगरेको भन्दै शिक्षा ऐनमा भएको विरोधाभाषपूर्ण धारामा टेकेर विभिन्न बहाना बनाएर सरकारी विद्यालयहरुले चर्को शुल्क लिइरहेका र निजी विद्यालयले पनि मनपरी रुपमा शुल्क असुल गरिरहेकाले नगरपालिकाले शैक्षिक क्षेत्रमा देखिएका तमाम विकृति, विसंगति र समस्याहरुको समाधान गर्नुपर्ने माग गरिएको छ ।
क्रान्तिकारीले विद्यालयहरुले १० प्रतिशत छात्रवृत्ति दिनुपर्नेमा लक्षित वर्गमा नपुगेको पाइएकाले त्यसको तत्काल छानविन गरी छात्रवृत्तिको प्रावधान कार्यान्वयन गर्नुपर्ने माग गरेको छ । अध्ययन माध्यम भाषाको विभेदलाई अन्त्य गर्न शिक्षा ऐनको दफा ७ (१) मा भएको प्रावधानबमोजिम समान भाषा माध्यम लागू गरी विषयगत आवश्यकताको आधारमा अन्य भाषाको प्रयोग गर्नुपर्ने माग मागपत्रमा छ । मागपत्रमा शैक्षिक क्षेत्रमा देखिएका समस्याहरुको समाधान नभएमा संगठन संघर्षमा होमिन बाध्य हुने र त्यसको जिम्मेवारी सम्बन्धित निकाय नै लिनुपर्ने चेतावनीसमेत दिइएको छ ।
