हेटौँडाः संघीय संसदमा पेश भएको विद्यालय शिक्षा विधेयकमा कमजोरी औँल्याउँदै ती कमजोरी सुधारको माग गर्दै शिक्षक महासंघले मंगलबार शिक्षा विकास तथा समन्वय इकाई मकवानपुरको कार्यालय परिसरमा धर्ना दिएका छन् । मंगलबार जिल्लास्तरीय विरोधको कार्यक्रमअन्तर्गत इकाईमा धर्ना दिएको हो । यसअघि शिक्षक महासंघले देशभरका पालिकामा धर्ना दिएका थिए ।
बिहान ११ बजेदेखि दिनको २ बजेसम्म धर्नापछि शिक्षक महासंघ मकवानपुरका अध्यक्ष जीधराज ढकालले शिक्षा विकास तथा समन्वय इकाई मकवानपुरका प्रमुख दीनानाथ गौतमलाई ज्ञापनपत्र बुझाउनुभयो । धर्ना कार्यक्रमकै बीचमा शिक्षक महासंघका घटक विभिन्न संगठनका जिल्ला अध्यक्षहरुले शिक्षा विधेयकमा सुधारको आवश्यकताका विषयमा आआफ्ना धारणा राखेका थिए । २ बजे धर्ना सकिएपछि ज्ञापनपत्र बुझाइएको हो ।
शिक्षक महासंघले संघीय सरकारसँग भएका ३० बुँदे र ५१ बुँदे सहमतिलाई विद्यालय शिक्षा विधेयकमा समावेश गर्न माग गरेको छ । तेस्रो चरणको आन्दोलनअन्तर्गत शिक्षक महासंघले भोलि बिहिबार प्रदेशस्तरीय कार्यक्रम गर्दैछ । शिक्षक महासंघको नेतृत्वमा सातै प्रदेशका शिक्षा मन्त्रालयमा धर्ना दिने कार्यक्रम रहेको नेपाल राष्ट्रिय शिक्षक संगठन मकवानपुरका अध्यक्ष श्रीराम दहालले जानकारी दिनुभएको छ ।
