हेटौँडाः भर्ना भएका विद्यार्थीको संख्याको तुलना प्रथम त्रैमासिक परीक्षामा उल्लेख्य संख्यामा विद्यार्थी अनुपस्थित भएको पाइएपछि मकवानपुरगढी गाउँपालिकाको शिक्षा शाखाले विद्यालयको सघन अनुगमन गर्ने भएको छ । असार २१ गतेदेखि सुरु भएर असार २९ गते सम्पन्न भएको प्रथम त्रैमासिक परीक्षामा ८ सय ५५ जना विद्यार्थी अनुपस्थित रहेको तथ्यांक सार्वजनिक भएको थियो ।
गाउँपालिकाको शिक्षा शाखाका प्रमुख राम घलानले अनुपस्थित हुने विद्यार्थीको संख्या अस्वभाविक र उल्लेख्य रहेकोले सघन अनुगमन गर्ने तयारीमा रहेको जानकारी दिनुभयो । प्रथम त्रैमासिक परीक्षा सकिएसँगै विद्यालयमा वर्षे विदा भएकोले साउन २८ गतेदेखि विद्यालय सुचारु भएपछि अनुगमन गरिने शिक्षा शाखा प्रमुख घलानले जानकारी दिनुभयो । चालु शैक्षिक सत्रमा पालिकामा ५ हजार ७ सय ५ जना विद्यार्थी भर्ना भएका थिए । प्रथम त्रैमासिक परीक्षामा ४ हजार ८ सय ५० जना विद्यार्थी सहभागी भएको घलानले बताउनुभयो ।
विद्यार्थी संख्याका आधारमा विविध प्रकारका अनुदान प्रदान गरिने भएकोले कतिपय विद्यालयले विद्यार्थीको भर्ना दर बढाएको हुन सक्ने अनुमान समेत गरिएको छ । मकवानपुरगढी गाउँपालिकामा ३७ वटा विद्यालय रहेका छन् । मकवानपुरगढी गाउँपालिकामा १२ कक्षासम्म अध्यापन हुने एक प्रविधिकसहित ४ वटा विद्यालय रहेको छ । यस्तै, १० कक्षासम्म अध्यापन हुने ६ वटा, ८ कक्षासम्म अध्यापन हुने ६ वटा विद्यालय र प्रावि तहका २२ वटा विद्यालय रहेका छन् ।
