हेटौंडाः हेटौंडा उपमहानगरपालिकाका १९ मध्ये १२ वटा वडामा आज शुक्रबार एकसाथ नियमित खोप कार्यक्रम सञ्चालन हुँदैछ । आज वडा नम्बर २, ३, ५, ६, ७, ८, ९, १३, १५, १७, १८ र १९ नम्बर वडामा खोप कार्यक्रम सञ्चालन हुँदैछ । खोप केन्द्रमा स्वास्थ्य अहेव तथा अनमीहरुले पीपीई लगाएर बालबालिकालाई खोप लगाइदिने छन् ।
कोरोना भाइरस (कोभिड–१९) को संक्रमणको जोखिमका कारण चैत र बैशाख महिनामा रोकिएको खोप कार्यक्रम जेठ १ गतेबाट सुरु भएको हो । २ वर्षभन्दा कम उमेरका बालबालिकालाई विभिन्न ८ प्रकारका खोप लगाउने कार्यलाई वडामै विस्तार गरी सञ्चालन गरेको हेटौंडा उपमहानगरपालिकाका आयुर्वेद तथा जनस्वास्थ्य शाखा प्रमुख रमन झाले जानकारी दिनुभयो । जिल्ला जनस्वास्थ्य कार्यालयको मातृशिशु स्वास्थ्य क्लिनिकमा सञ्चालन हुने नियमित खोप कार्यक्रममा सहभागी हुन सबै वडाका नागरिकलाई सहज नहुने भएकोले उपमहानगरपालिकाले नियमित खोप कार्यक्रम वडामै सञ्चालन गरेको झाले बताउनुभयो ।
हेटौंडा उपमहानगरपालिकाका सबै वडामा खोप केन्द्र स्थापना गरिएको छ । ९३ जना स्वास्थ्य स्वयम्सेविकाले खोप कार्यक्रममा सहभागी हुन नगरवासीलाई प्रेरित गर्ने काम गरिरहेका छन् । उपमहानगरपालिकाले नियमित खोप कार्यक्रम वडास्थित स्वास्थ्य इकाईहरुसँगको समन्वयमा हरेक महिना सञ्चालन गर्नेछ ।
