हेटौंडाः हेटौंडा उपमहानगरपालिकाको आयोजनामा नमुना युवा नगर सभाको अभ्यास सम्बन्धी प्रशिक्षण सुरु भएको छ । प्रशिक्षणको बिहिबार उपमहानगरपालिकाकी प्रमुख मिना कुमारी लामाले उद्घाटन गर्नुभयो ।
युवा नेतृत्व तथा विकासमा सहयोग गर्न, युवाको सीप विकास तथा व्यक्तित्व विकास, युवामैत्री राष्ट्र नीति योजना र कार्यक्रम निर्माणका लागि राज्यलाई सुझाव दिई सकारात्मक वातावरण निर्माण गर्न तालिम आयोजना गरिएको जिल्ला युवा परिषद् मकवानपुर जिल्ला युवा समितिका अध्यक्ष शिवहरी दाहालले जानकारी दिनुभयो । तालिममा नेपालको शासन प्रणाली र विकासका प्रक्रियाको बारेमा सूचीकृत गर्नेबारे छलफल र अभ्यास हुने उहाँले बताउनुभयो ।
कार्यक्रमले फरकफरक कामहरुमा युवाहरुलाई राज्यसँग जोड्ने र महिला सशक्तिकरणको लागि जोड दिने उहाँले बताउनुभयो । नगरमा हुने र भएको कार्य सम्बन्धी जानकारी गराउन वडा १ देखि १९ नम्बर वडाका विभिन्न क्याम्पसका र विद्यालयका विद्यार्थीहरुलाई तालिममा सहभागी गराएको उहाँले बताउनुभयो । आइतबारसम्म चल्ने तालिममा श्याम काजी खत्री र स्वेच्छा दंगालले प्रशिक्षण दिइरहनुभएको छ ।
उपमहानगरपालिकाका युवा तथा खेलकुद शाखाका प्रमुख बसन्त कुमार सिटौलाको अध्यक्षतामा भएको कार्यक्रममा उपमहानगरपालिका कानून शाखा प्रमुख लक्ष्मण मैनाली र युवा अभियन्ता किशोर कुमार टण्डन लगाएतको उपस्थिति रहेको थियो ।
