हेटौँडाः बागमती प्रदेश सरकारका स्वास्थ्य मन्त्री उत्तम जोशीले सोमबार हेटौँडा सामुदायिक आँखा अस्पतालको अवलोकन गर्नुभएको छ । अस्पतालले आवश्यक सहयोगका लागि पहल गर्ने क्रममा मन्त्री जोशीले अस्पताल भ्रमण गरी अस्पतालको वस्तुस्थितिका बारेमा समेत जानकारी लिने गरी अवलोकन गर्नुभएको हो ।
अस्पतालको अवलोकनपछि मन्त्री जोशीलाई अस्पतालका प्रशासन प्रमुख सुधीर श्रेष्ठले अस्पतालको वस्तुस्थितिका बारेमा जानकारी गराउनुभएको थियो । अस्पतालले नियमित ओपिडी, आकस्मिक उपचार सेवाका साथै शल्यक्रिया गरी आँखाको उपचार गर्दै आएको श्रेष्ठले जानकारी दिनुभयो । विभिन्न सामुदायिक तथा सामाजिक संघ, संस्थासँगको सहकार्यमा हेटौँडा सामुदायिक आँखा अस्पतालले विभिन्न स्थानमा आँखा जाँच शिविर गर्नुका साथै निशूल्क मोतिविन्दुको शल्यक्रिया सेवा समेत प्रदान गर्दै आएको श्रेष्ठले बताउनुभयो । अस्पतालको वस्तुस्थितिबारे जानकारी गराएसँगै अस्पतालका प्रमुख डा. सुनिल थकाली, संरक्षक सिद्धिलाल श्रेष्ठ र प्रशासन प्रमुख सुधीर श्रेष्ठले संयुक्तरुपमा प्रदेश सरकारलाई सहयोगका लागि मागपत्र बुझाएका छन् । अस्पतालले मोतिविन्दुको उपचारको क्रममा आवश्यक बायोमेट्रिक मेसिन उपलब्ध गराइदिन माग गरिएको छ ।
बायोमेट्रिक मेसिन मोतीबिन्दु रोगको शल्यक्रिया गर्नुअघि लेन्सको पावर नाप्न प्रयोग गरिने अस्पतालका प्रमुख डा. सुनिल थकालीले बताउनुभयो । अहिले अस्पतालमा रहेको बायोम्याट्रिक मेसिन पुरानो भएकोले नयाँ मेसिनका लागि प्रदेश सरकारसँग आग्रह गरिएको डा. थकालीले जानकारी दिनुभएको छ । बायोमेट्रिक मेसिन खरिद गर्न करिब २५ लाख रुपैयाँ लाग्ने डा. थकालीले बताउनुभएको छ ।
यस्तै आँखामा लगाउने लेन्स उत्पादन उद्योग काठमाडौंबाट हेटौँडा सार्ने तयारी भइरहेको अस्पतालका संरक्षक सिद्धिलाल श्रेष्ठले जानकारी दिनुभयो । उद्योगका लागि प्रशासनिक भवन र पर्खाल निर्माण भइसकेको र केही महिनाभित्रै लेन्स उद्योग हेटौंडा–३, बसामाडीमा सञ्चालनमा आउने संरक्षक श्रेष्ठले बताउनुभयो । हेटौँडा सामुदायिक आँखा अस्पतालले मकवानपुरका स्थानीय पालिकासँगको सहकार्यमा पालिकामै ग्रामीण आँखा केन्द्र स्थापना गरी आँखाको आधारभूत स्वास्थ्य परीक्षण र उपचारको कार्य गर्दै आएको छ । गत साता मात्रै मकवानपुरको इन्द्रसरोवर गाउँपालिकामा ग्रामीण आँखा केन्द्र स्थापना गरिएको थियो । यसअघि थाहा नगरपालिका, मनहरी गाउँपालिका, बागमती गाउँपालिका, कैलाश गाउँपालिका ग्रामीण आँखा केन्द्र सञ्चालनमा रहेको छ । बकैया गाउँपालिकामा छिट्टै ग्रामीण आँखा केन्द्र स्थापना गर्ने तयारी भइरहेको छ । यस्तै राक्सिराङ, भीमफेदी र मकवानपुरगढीमा पनि ग्रामीण आँखा केन्द्र स्थापनाको पहल भइरहेको प्रशासन प्रमुख सुधीर श्रेष्ठले जानकारी दिनुभएको छ ।
