हेटौँडाः हेटौँडा–१५, जाँतेमा एक महिलाले आफ्ना दुई सन्तानलाई विष पिलाएर आफूले पनि विष पिएकी छिन् । बुधबार साँझ ५ बजेर ५० मिनेटको समयमा ३६ वर्षीया सोनी पाख्रिनले ७ वर्षीय छोरा अस्किन वाईवा र १८ महिनाको छोरा जेनिस वाईवालाई विषादी पिलाएर आफूले पनि विषादी सेवन गरेको मकवानपुर प्रहरीले जनाएको छ ।
विषादी सेवनबाट बिरामी भएका तीनैजनालाई हेटौँडा अस्पतालमा उपचारका लागि पुर्याइएको थियो । थप उपचारका लागि भरतपुर पठाइएकोमा १८ महिने छोरा जेनिस वाईबाको बिहिबार बिहान ७ बजेर ५० मिनेटमा मृत्यु भएको प्रहरीले जनाएको छ । अस्किनको अवस्था मध्यम रहेको र सोनीको अवस्था भने गम्भीर रहेको मकवानपुरका प्रहरी प्रवक्ता टेकबहादुर कार्कीले जानकारी दिनुभएको छ ।
के कारणले विषादी सेवन गर्यो भन्ने स्पष्ट नभएको प्रहरीले जनाएको छ । यता वडा अध्यक्ष सुनिल मोक्तानले पनि दुखद् घटना भएको बताउनुभयो । परिवारमा त्यस्तो समस्या जस्तो नदेखिएको उल्लेख गर्नुहुँदै वडा अध्यक्ष मोक्तानले घाइतेको उपचार र घटनाबारे बुझ्ने प्रयास भइरहेको बताउनुभएको छ ।
