हेटौंडाः हेटौंडा–११, नवलपुरस्थित त्रिभुवन माविमा दोस्रो बस भित्रिएको छ । बागमती प्रदेश सरकारको सामाजिक विकास मन्त्रालयबाट २५ लाख रुपैयाँ र हेटौंडा उपमहानगरपालिकाबाट ५ लाख रुपैयाँ अनुदान प्राप्त गरेको विद्यालयले भन्सार छुट सुविधासहित ४२ सिट क्षमताको बस खरिद गरेको छ । यसअघि विद्यालयसँग ३२ सिट क्षमताको बस थियो ।
विद्यालयमा दुईवटा बस भएसँगै शैक्षिक सत्र २०८० मा २ सय विद्यार्थी थप गरी ९ सयदेखि १ हजार संख्यामा विद्यार्थी भर्ना गर्ने लक्ष्य रहेको प्रधानाध्यापक नारायणप्रसाद भण्डारीले बताउनुभएको छ । २०७७ सालमा प्रधानाध्यापकको जिम्मेवारी सम्हाल्दा ४ सय ७४ जना विद्यार्थी रहेको उल्लेख गर्नुहुँदै शैक्षिक सत्र २०७८ मा ६ सय ९८, शैक्षिक सत्र २०७९ मा ७ सय ५० विद्यार्थी भर्ना गर्न सफल भएको प्रधानाध्यापक भण्डारीको भनाइ छ । बसको प्रयोग गरेर वडाभित्रकै विद्यार्थीलाई विद्यालयको पहूँचमा ल्याउन खोजेको उहाँले जानकारी दिनुभएको छ ।
विद्यालयले अंग्रेजी माध्यममा पठनपाठन सुरु गरेसँगै विद्यार्थी र अभिभावकको आकर्षण बढेको हो । अहिले त्रिभुवन माविमा ५ कक्षासम्म पूर्णरुपमा अंग्रेजी माध्यममा पठनपाठन भइरहेको छ भने ६ कक्षादेखि १० कक्षासम्म नेपाली र अंग्रेजी दुबै माध्यममा पठनपाठन भइरहेको छ । १२ कक्षासम्म पठनपाठन हुने त्रिभुवन माविमा प्राविधिकतर्फ ३ वर्षे खाद्य तथा प्रविधि विषय पनि पठनपाठन भइरहेको छ । गत वर्ष अन्तिम समयमा स्वीकृति प्राप्त भएकोले ४० जना विद्यार्थीको कोटामा ८ जना विद्यार्थी मात्रै भर्ना गर्न सकेको विद्यालयले यो वर्ष कोटाअनुसार ४० जना विद्यार्थी नै भर्ना गर्ने प्रधानाध्यापक भण्डारीले दावी गर्नुभएको छ । विद्यालयमा हरेक वर्ष भर्ना भएका विद्यार्थी मध्ये करिब ५ प्रतिशत विद्यार्थीले बीचमै पढाई छाड्ने प्रवृत्ति रहेको उहाँको भनाइ छ ।
