हेटौंडाः उद्योगी, व्यवसायीको छाता संस्था नेपाल उद्योग वाणिज्य महासंघको उपाध्यक्षमा मकवानपुरका उद्योगी अरुण राज सुमार्गीले उम्मेदवारी दर्ता गराउनुभएको छ । यस्तै कार्यसमिति सदस्यतर्फ मकवानपुर उद्योग वाणिज्य संघका निवर्तमान अध्यक्ष कृष्ण कटुवालले उम्मेदवारी दर्ता गराउनुभएको छ ।
सुमार्गीले जिल्ला/नगरतर्फ उपाध्यक्षमा उम्मेदवारी दर्ता गराउनुभएको हो । मंगलबार उम्मेदवारी दर्ता गरिएको हो । यही चैत २९ गते मतदानको कार्यक्रम हुनेछ । मकवानपुरका सुमार्गी र कटुवाल अञ्जन श्रेष्ठको प्यानलमा हुनुहुन्छ । जिल्ला/नगर उपाध्यक्षमा सुमार्गीको प्रतिस्पर्धीमा दिनेश श्रेष्ठ र श्रीकृष्ण वैद्य हुनुुहुन्छ । यस्तै खुलातर्फ १८ जना सदस्यमा कटुवालसँगै ३२ जनाको उम्मेदवारी परेको छ ।
महासंघको आसन्न निर्वाचनमा वरिष्ठ उपाध्यक्षमा उमेश लाल श्रेष्ठ, अन्जन श्रेष्ठ र रामचन्द्र संघाईको उम्मेदवारी परेको छ । महासंघमा वरिष्ठ उपाध्यक्ष स्वतः अध्यक्ष हुने प्रावधान छ । चैत २८ र २९ गते हुने वार्षिक साधारणसभापछि चन्द्र ढकाल स्वतः महासंघको अध्यक्षमा पदस्थापित हुनुहुनेछ ।
