हेटौंडाः हेटौंडामा अल नेपाल नोभिस बक्सिङ प्रतियोगिता सुरु भएको छ । मकवानपुर जिल्ला बक्सिङ संघ र बागमती प्रदेश खेलकुद विकास परिषद्को आयोजनामा सुरु प्रतियोगिताको मंगलबार बागमती प्रदेश सरकारकी सामाजिक विकासमन्त्री कुमारी मोक्तानले उद्घाटन गर्नुभयो ।
कार्यक्रममा बोल्नुहुँदै मन्त्री मोक्तानले खेलले राष्ट्रलाई चिनाउने र व्यक्ति स्वच्छ बनाउने बताउनुभयो । बागमती प्रदेश सरकारले खेल क्षेत्रमा सहयोग गरिरहेको उहाँले बताउनुभयो । उहाँले प्रतियोगितामा सहभागी खेलाडीलाई सम्मानजनक उपस्थिति भएर अनुशासित भएर खेल्न आग्रह समेत गर्नुभएको छ । यस्तै जिल्ला बक्सिङ संघ मकवानपुरका अध्यक्ष दीपेश जोशीले नयाँ पुस्ताका युवाहरुलाई बक्सिङतर्फ अगाडि बढाउने प्रयासले प्रतियोगिता आयोजना गरेको बताउनुभयो । उहाँले प्रतियोगितालाई निरन्तरता दिन प्रदेश सरकार तयार रहेको बताउनुभयो ।
हेटौंडा–४, परिजातपथस्थित कभर्ड हल सुरु प्रतियोगितामा २५ जिल्लाका करिब १ सय ५० जनाभन्दा बढी खेलाडीहरुको सहभागिता छ । प्रतियोगितामा खेलाडीहरुको तर्फबाट मकवानपुरका सोहन राई र निर्णायकहरुको तर्फबाट इन्द्र बहादुर श्रेष्ठले सपथ लिनुभएको छ । प्रतियोगितामा १७ बर्षदेखि २१ बर्ष उमेरसम्मका खेलाडीहरुले प्रतिस्पर्धा गरिरहेका छन् । प्रतियोगितामा सहभागी खेलाडीहरुले १६ विधामा प्रतिस्पर्धा गर्नेछन् । पुरुषतर्फ ९ र महिलातर्फ ७ वटा तौल समुहमा प्रतिस्पर्धा हुनेछ ।
प्रतियोगितामा मकवानपुरका तीन जना पुरुष र एक जना महिला खेलाडी सहभागी छन् । पुरुषतर्फ ४८, ५७ र ६३ केजी तौल समुहमा र महिलातर्फ ५० केजी तौल समुहमा मकवानपुरका खेलाडी सहभागी छन् । विधागत प्रथम, द्वितीय र तृतीय हुने खेलाडीले क्रमशः १० हजार, ५ हजार र ३ हजार रुपैयाँ प्राप्त गर्नेछन् । प्रतियोगिता चैत्र ४ गतेसम्म चल्नेछ ।
प्रतियोगिता उद्घाटन कार्यक्रममा जिल्ला समन्वय समिति मकवानपुरका प्रमुख ललित घलान, हेटौंडा उपमहानगरपालिकाका निवर्तमान प्रमुख हरी बहादुर महत, हेटौंडा–४ का वडाध्यक्ष नवीन सिग्देल, ५ नम्बर वडाध्यक्ष सुशील घिमिरे, ११ नम्बर वडा अध्यक्ष जुना दाहाल, बागमती प्रदेश खेलकुद विकास परिषद्का सदस्य सचिव सूर्यलाल भण्डारी, नेपाल बक्सिङ संघका अध्यक्ष राम अवाले, जिल्ला खेलकुद विकास समिति मकवानपुरका अध्यक्ष वेष खड्गी लगायतको आतिथ्य रहेको थियो ।
