हेटौंडाः बागमती प्रदेश नीति तथा योजना आयोगका सदस्य प्रा.डा. जयन्त नाथ खनालले पदको सपथ लिनुभएको पाँचौं दिनमै राजिनामा दिनुभएको छ । फागुन १० गते बुधबार नीति तथा योजना आयोगको सदस्य पदको सपथ ग्रहण गर्नु भई जिम्मेवारी सम्हाल्नु भएका खनालले पाँचौ दिनको दिन आइतबार पदबाट राजिनामा दिनुभएको हो ।
राष्ट्रिय प्रजातन्त्र पार्टी (राप्रपा) को सिफारिसमा सदस्य नियुक्त हुनुभएका खनाल प्रदेश सरकारबाट राप्रपाका मन्त्रीहरुले राजिनामा दिएको भोलिपल्ट नै पदबाट राजिनामा गर्नुभएको हो । संघीय सरकारको नेतृत्व गरिरहेको नेकपा माओवादी केन्द्रले सत्ता गठबन्धन भन्दा बाहिरको उम्मेदवारलाई राष्ट्रपतिमा समर्थन जनाएपछि राप्रपाले संघीय सरकार छाड्ने निर्णय गरेको थियो । संघीय सरकार छाडेसँगै बागमती प्रदेश सरकारमा राप्रपाका उद्धव थापा नेतृत्वको तीन जना मन्त्रीले शनिबार साँझ मुख्यमन्त्रीलाई राजिनामा बुझाएका थिए ।
पार्टीले सरकार छाडेपछि नैतिकताका आधारमा पदबाट राजिनामा दिएको प्रा.डा. खनालले बताउनुभयो । राप्रपा केन्द्रीय सदस्य समेत रहनुभएका प्रा.डा. खनालले वासेरमार्फत प्रदेश नीति तथा योजना आयोगका उपाध्यक्षसमक्ष राजिनामा दिनुभएको हो । बागमती प्रदेश सरकारका प्रमुख सचिव मुकुन्द निरौलाका अनुसार प्रदेश नीति तथा योजना आयोगका सदस्यले उपाध्यक्ष सामु राजिनामा बुझाएपछि स्वतः पदमुक्त हुने व्यवस्था छ । मंगलबार बिहान प्रदेश मन्त्रिपरिषद्को बैठकमा प्रमुख सचिव निरौलाले नीति तथा योजना आयोजनाका सदस्य प्रा.डा. खनालले पदबाट राजिनामा दिनुभएको जानकारी गराउनुभएको थियो ।
