हेटौंडाः लकडाउनका बेला उपभोक्ताले सहज रुपमा उपभोग्य वस्तु खरिद गर्न नपाइरहेका बेला मकवानपुर जिल्ला सहकारी संघको समन्वयमा जिल्लाका विषयगत सहकारी संघमार्फत कृषि उपज विक्री वितरणको कार्य आजबाट सुरु भएको छ । जिल्ला कृषि सहकारी संघ मकवानपुरको हेटौंडा–४, हुप्रचौरस्थित कृषि मार्टबाट प्याकेजिङ गरेर तरकारी विक्री वितरण सुरु भएको हो ।
जिल्लाको उत्तरीक्षेत्र थाहा नगरपालिकाको बज्रबाराही क्षेत्रबाट आज बिहान आइपुगेको तरकारी काउली, मुला, मटरकोसा र हरियो धनियाँ प्याकेजिङ गरेर आजबाट विक्री वितरण सुरु गरिएको हो । जिल्ला सहकारी संघ मकवानपुरले बागमती प्रदेशका मुख्यमन्त्री डोरमणि पौडेल र भूमि व्यवस्था, कृषि तथा सहकारी मन्त्री दावा दोर्जे लामाको उपस्थितिमा आज बिहान सहकारीमार्फत तरकारी विक्री वितरणको कार्यको सुरुवात गरेको छ ।
सहकारीले काउली, मुला, मटरकोसा र धनियाँ राखेर कुल चार केजी छ सय ग्रामको प्याकेट एक सय १५ रुपैयाँमा विक्री गरेको छ । जिल्लाका विभिन्न सहकारी संस्थाहरुले माग गरेबमोजिम तरकारी वितरण गरिएको जिल्ला कृषि सहकारी संघ मकवानपुरका व्यवस्थापक नरेश आचार्यले जानकारी दिनुभयो । बज्रबाराहीबाट आएको दुई हजार एक सय केजी काउली, एक हजार चार सय ५० केजी मुला, आठ सय ५० केजी मटरकोसा र ४० केजी हरियो धनियाँ आज वितरण गरिएको छ । बागमती प्रदेश सरकारको भूमि व्यवस्था, कृषि तथा सहकारी मन्त्रालयले उपलब्ध गराएको एउटा गाडीमार्फत जिल्लाका विभिन्न सहकारी संस्थामा तरकारी पुर्याइएको छ ।
पहिलो चरणमा करिब तीन हजार केजी तरकारी ल्याउने योजना बनाए पनि माग झण्डै दोब्बर भएसँगै बज्रराहीबाट कुल चार हजार चार सय ४० केजी तरकारी ल्याइएको थियो । विभिन्न सहकारीले एक हजार एक सय प्याकेट तरकारी माग आएको जिल्ला कृषि सहकारी संघ मकवानपुरका व्यवस्थापक गोविन्द दाहालले जानकारी दिनुभयो । मागअनुसार वितरणको प्रयास भइरहेको उहाँको भनाइ छ । सहकारीले एक दिन बिराएर तरकारी ल्याई वितरण गर्ने जनाएको छ । अब शुक्रबार बिहान थाहा नगरपालिकाकै चित्लाङ क्षेत्रका साथै मनहरी गाउँपालिकाबाट पनि तरकारी ल्याउने जनाएको छ । मनहरी गाउँपालिकाबाट लहरेबालीअन्तर्गत बोडी र करेला ल्याउने कृषि सहकारी संघका व्यवस्थापक नरेश आचार्यले जानकारी दिनुभयो ।
तरकारीको प्याकेजिङ र वितरणमा सहकारी संघका व्यवस्थापक र कर्मचारीहरु नै स्वयम्सेवी रुपमा खटिएका छन् । उनीहरुले परीक्षणको रुपमा प्याकेजिङको प्रयास भएको जनाउँदै यसलाई नियमित र व्यवस्थित बनाउँदै लैजाने जनाएका छन् । आज बिहान तरकारी वितरण व्यवस्थापनका विषयमा जिल्ला सहकारी संघ मकवानपुरका अध्यक्ष नारायण देवकोटा, निवर्तमान अध्यक्ष बद्रिप्रसाद लम्सालले निरीक्षण गर्नुहुँदै अहिलेको कामको समीक्षा गरेर आवश्यकताअनुसार काम गर्न व्यवस्थापकहरुलाई निर्देशन दिएका छन् ।
