हेटौंडाः नुवाकोट जिल्लाको ककनी गाउँपालिका–३, मानेखर्कमा श्रीमति र सालोको कुटाई खाएर ३० वर्षीय राजु लामाको मृत्यु भएको छ । शनिबार दिउँसो २ बजेको समयमा श्रीमति २५ वर्षीया सानुमाया तामाङ र सालो २१ वर्षीय सानुभाई तामाङले घरायसी बिबादमा राजुलाई कुटपिट गरेको प्रहरीले जनाएको छ ।
श्रीमति र सालोको कुटाईबाट घाइते भएका राजुलाई आइतबार साँझ ६ बजेर ४५ मिनेटको समयमा काठमाडौंस्थित त्रिवि शिक्षण अस्पतालमा लगिएको थियो । उपचारको क्रममा राजुको आइतबार साँझ साढे ८ बजेको समयमा मृत्यु भएको हो । राजुलाई कुटपिट गर्ने सानुमाया र सानुभाई दुबै फरार रहेको र खोजी कार्य भइरहेको बागमती प्रदेश प्रहरी कार्यालयले जनाएको छ ।
