हेटौंडाः हेटौंडा उपमहानगरपालिकाका मेयर हरि बहादुर महतलाई आज बिहीबार एक कार्यक्रमका बीच बिदाई गरिएको छ । बिदाई कार्यक्रममा २०७४ सालको स्थानीय तहको निर्वाचनबाट मेयर बनेका महतले उपमहानगरपालिकामा कार्यरत सबै कर्मचारीहरुलाई धन्यवाद ज्ञापन गर्नुभएको छ ।
कार्यक्रममा ५ वर्षे कार्यकालमा उल्लेखनीय कार्य गर्न कर्मचारीहरुको ठुलो हात रहेको बताउनुहुँदै उहाँले सबै कर्मचारीलाई धन्यवाद दिनुभएको हो । मेयर महतले आफ्नो कार्यकालमा हेटौंडा उपमहानगरपालिकालाई देशकै नमुना उपमहानगर बनाउन सफल भएको र त्यसमा सबै कर्मचारीकै महत्वपुर्ण भुमिका रहेको बताउनुभयो । आफुले कर्मचारीको मनको कुरालाई राम्ररी बुझेर उत्कृष्ट कार्य गर्न र गराउन सफल भएको र अब आउने जनप्रतिनिधि पनि त्यस्तै आउनुपर्ने महतको भनाई छ । आफु अहिले पदबाट बिदाई मात्र भएको भन्दै उहाँले सामाजिक क्षेत्रको विकासमा सदैब तत्पर रहेको बताउनुभयो । यस्तै, हेटौंडा उपमहानगरपालिकाका प्रमुख प्रशासकीय अधिकृत शिव नारायण चौलागाईँले मेयर महतको कार्यकालमा कर्मचारी परिचालन राम्ररी भएको बताउनुभयो । सबै कर्मचारीबाट सेवा सुविधा राम्ररी प्रवाह गर्न सफल भएको उहाँले बताउनुभयो ।
