हेटौंडाः आगामी बैशाख ३० गते हुने स्थानीय तह निर्वाचनमा हेटौंडा उपमाहानगरपालिकाको मेयर पदका उम्मेदवार दीपकबहादुर सिंहले आफू मेयर भएपश्चात् नगरपालिकालाई भ्रष्टाचारमुक्त नगरपालिका बनाउने बताउनुभएको छ । राष्ट्रिय प्रजातन्त्र पार्टीबाट मेयरको उम्मेदवार बन्नुभएका सिंहले मंगलबार पत्रकार सम्मेलन गर्दै नगरपालिकामा कतिपय कार्य गर्न कर्मचारीले ढिलासुस्ती गर्ने भएकाले आफूले मेयर भएपछि नगरबासीको कामलाई छिटो र सरल बनाउने बताउनुभएको हो ।
उहाँले आफू मेयर भएपश्चात् आफूलाई प्राप्त हुने सरकारी सेवा सुविधा पनि नलिने बताउनु भएको छ । सरकारबाट प्राप्त हुने तलब भत्तामा आफूले व्यक्तिगत दुई सय प्रतिशत थप गरी प्रत्येक वडामा विकासका लागि खर्च गर्ने उहाँले बताउनुभएको छ । हेटौंडाका प्रत्येक वडाका वृद्ध–वृद्धाहरुलाई घरघरमै वृद्धभत्ता लगेर दिने व्यवस्था गर्ने सिंहले बताउनुभयो । हेटौंडामा स्वास्थ्य क्षेत्रमा सुधार गर्ने उहाँले दावी गर्नुभयो । गम्भीर बिरामी भएमा अन्यत्रको अस्पतालमा जानुपर्ने समस्या अहिले भएकाले आफूले दक्ष जनशक्तिको व्यवस्थापन गर्नसक्ने सिंहको भनाई छ ।
राम्रो मान्छेभन्दा आफ्नोे कार्याकर्ताको लागि मात्र अन्य पार्टीका नेताहरुले कार्य गरेको र आफ्नो मान्छेको मात्रै विकास गर्ने अरु पार्टीको धारणा भएको भन्दै सिंहले आफू मेयर भएपश्चात् कुनैपनि पक्षपात नगर्ने बताउनुभयो । मेयर भएपश्चात् आफ्नो कार्यकालमा कुनै दलको नेता नभई सबैको साझा मेयर भएर काम गर्ने उहाँले बताउनुभयो । आगामी बैशाख २५ गते हेटौंडामा राष्ट्रिय प्रजातन्त्र पार्टीले चुनावी सभा गर्ने भएको छ । उक्त सभालाई सम्बोधन गर्न राष्ट्रिय प्रजतन्त्र पार्टीका अध्यक्ष राजेन्द्र लिङ्देन आउनुहुने बताइएको छ ।
