हेटौंडाः नेपाली काँग्रेस जिल्ला कार्यसमिति मकवानपुरका सभापति बुद्ध लामाले पार्टी कार्यालयमा तालाबन्दी गर्नेलाई कारबाही गरिने बताउनुभएको छ । पार्टी कार्यालयमा तालाबन्दी गर्न संलग्न हेटौंडा उपमहानगरपालिका तरुण दलका सभापति सुनिल गिरी र जिल्ला कमिटीका सदस्यहरुलाई विधि र विधान अनुसार कारबाही गरिने उहाँले बताउनुभयो ।
आज मंगलबार सभापति गिरीको नेतृत्वमा हेटौंडा नगरको सभापतिमा काङ्ग्रेसले टिकट पाउनुपर्छ भन्दै पार्टी कार्यलयमा तालाबन्दी गरेको थियो । सभापति लामाले पार्टी कार्यालयमा सबैको कुरा, भावना राख्ने तर पार्टी कार्यालय जस्ता साझा संस्थामा तालाबन्दी लगाउन नहुने बताउनुभयोे । तालाबन्दी लगाउने कामले विपक्षी दललाई हसाउने र पार्टीका कार्यकर्ताको मनोबल घट्ने उहाँको भनाई छ । ‘म पार्टी कार्यालयमा थिइन । तालाबन्दी गरेको कुरा सुनेँ । मैले फोन गरेर किन पार्टी कार्यालयमा तालाबन्दी लगाएको भनेर सोधेका थिए । सभापति लामाले भन्नुभयो, “हेटौंडाको प्रमुखमा काँग्रेसले टिकट पाउँनुपर्छ भन्ने उनीहरुको माग थियो ।”
यसअघि गिरीले पटक–पटक सामाजिक संजालमा पार्टी छोड्ने घोषणा गरेको र अहिले पनि विधि विधान विपरीत काम गरेको उहाँको भनाई छ । उहाँले हेटौंडा उपमहानगरपालिकाको मेयरमा काँग्रेसले नै टिकट पाउनुपर्छ भन्ने पक्षमा रहेको बताउनुभयो । गत स्थानीय तहको निर्वाचनमा पनि हेटौंडाको मेयरका लागि काँग्रेस नेकपा एमालेसँग थोरै मतले पराजित भएको र अहिले काँग्र्र्रेसले जित्ने सम्भावना बलियो भएको उहाँले दाबी गर्नुभयो । उपमहानगरपालिकाका मेयर चयनका लागि केन्द्रले नै निर्णय गर्ने भएकोले केन्द्र अनुसार चल्नुपर्ने उहाँले बताउनुभयो ।
