हेटौंडाः हेटौंडा–४ हुप्रचौरमा आज बुधबारबाट खुल्ला नकआउट ७ “ए” साइड फुटबल प्रतियोगिता सुरु भएको छ । नेपाल खेलकुद महासंघ जिल्ला कमिटी मकवानपुरको आयोजनामा आजबाट प्रतियोगिता सुरु भएको हो ।
आज भएको उद्घाटन खेलमा गोरखा व्वाइजले भुटनदेवी युवा क्लबलाई २–० गोल अन्तरले हराएको छ । आजै भएको दोस्रो खेलमा ७ नम्बर फुटबल क्लबलाई आर.आर.एफ्सीले ३–० गोलले हराएको छ । प्रतियोगिता अन्तर्गत आज ८ वटा खेल सम्पन्न हुने जनाइएको छ ।
प्रतियोगितामा प्रथम हुने टिमले नगद ५० हजार रुपैयाँ तथा द्वितीय हुने टिमले नगद २५ हजार रुपैयाँसहित शिल्ड, मेडल र प्रमाणपत्र प्राप्त गर्ने खेलकुद महासंघ मकवानपुरका अध्यक्ष सविन मोक्तानले जानकारी दिनुभयो । प्रतियोगिता शनिबारसम्म सञ्चालन हुनेछ ।
