हेटौंडाः आगामी बैशाख ३० गते हुने स्थानीय तहको निर्वाचनलाई व्यवस्थित बनाउनु पर्नेमा बागमती प्रदेश सभाका सदस्यहरुले जोड दिएका छन् । मंगलबार बागमति प्रदेश प्रदेश सभा बैठकको शून्य समयमा बोल्दै प्रदेश सभा सदस्यहरुले निर्वाचन व्यवस्थित बनाउन सरकारको ध्यानाकर्षण गराएका हुन् ।
आगामी बर्ष चुनावी बर्ष भएको भन्दै प्रदेश सभा सदस्य रमेश पौड्यालले निर्वाचन आयोगले निर्वाचनमा उम्मेदवारले खर्च गर्न पाउने अधिकतम सीमा जायज नभएको बताउनुभयो । उहाँले भन्नुभयो, “नगरपालिकाको मेयरको उम्मेदवारले ४ लाख ५० हजार रुपैयाँसम्म खर्च गर्न पाउने भनिएको छ । त्यो रकमले पुग्छ भन्ने विश्वास लाग्छ ? मेयरले टिकट लिन पार्टीमा लगानी गर्नुपर्छ । भोज भतेर खुवाउनु पर्छ ।” उम्मेदवारले पार्टी भित्र र बाहिर लगानी नगरे टिकट पाउन मुस्किल रहेको उहाँको भनाइ छ । मेयर उम्मेदवार हुन ४ करोड भन्दा धेरै खर्च हुने उहाँले जानकारी दिनुभयो । उहाँले थप्नुभयो, “हाम्रो निर्वाचन प्रणालीमा भयंकर रोग छ । त्यो रोगको उपचार गर्नुपर्छ ।” निर्वाचनको खर्च पारदर्शी गर्ने परिपाटी विकास हुनु जरुरी रहेको उहाँको भनाइ छ ।
यस्तै, प्रदेश सभाका अर्का सदस्य नरोत्तम वैद्यले आगामी निर्वाचनमा कागजकै मत राखेर चुनाव गर्नु दुखद् रहेको धारणा राख्नुभयो । उहाँका अनुसार विद्युतीय मेसिन राखेर चुनाव गराउन सकेमा सरकारको अर्बौ रकम बचत हुन्छ । मेसिनबाट चुनाव गराउँदा पारदर्शिताका साथै चुनावी परिणाम छिटो आउने उहाँको भनाइ छ । यस्तै, प्रदेश सभा सदस्य शोभा शाक्यले स्थानीय चुनाव नजिकै आएको भन्दै राजनीतिक दलहरु चुनावको भोज भतेरमा दगुरेको आरोप लगाउनुभयो । उहाँले आम नागरिकलाई मूल्य वृद्धिले ठूलो मार परेको भन्दै तीन तहको सरकारले बजार मूल्य नियन्त्रण र व्यवस्थित गर्नतर्फ ध्यान दिनुपर्ने धारणा राख्नुभयो ।
प्रदेश सभा सदस्य राज काजी महर्जनले ऐतिहासिक सम्पदाको चोरी गर्नेलाई कडा कारबाही गर्न ध्यानाकर्षण गराउनुभयो । शून्य समयमा बोल्दै प्रदेश सभा सदस्य जगतबहादुर सिंखडाले सरकारको लगानी रहेको योजनाहरु अलपत्र रहने गुनासो गर्नुभयो । उहाँले धादिङको भिपुराश्वर गाउँपालिका जोड्ने पुलमा सरकारले बजेट निकासा गरेपनि अलपत्र अवस्थामा रहेको जानकारी गराउनुभयो । बैठकको शून्य समयमा प्रदेश सभा सदस्य राजेन्द्र गुरुङसहित ६ जना सदस्यले आफ्नो भनाइ राखेका थिए । आगामी बैठक अर्को सूचना नभएसम्म स्थगित गरिएको सभामुख सानु कुमार श्रेष्ठले जानकारी दिनुभयो ।
दफावार छलफलमा ३ विधेयक
हेटौंडाः बागमति प्रदेशको मंगलबार बसेको बैठकले ३ वटा विधेयकलाई दफावार छलफलका लागि समितिमा पठाएको छ । बागमती प्रदेशका आन्तरिक मामिला तथा कानुन मन्त्री कृष्ण प्रसाद शर्मा खनालले प्रदेश सभामा प्रस्ताव पेश गर्नुभएको ३ वटा विधेयक दफावार छलफलका लागि समितिमा पठाइएको हो ।
बैठकले प्रदेश विपद् व्यवस्थापन ऐन, २०७५ लाई संशोधन गर्न बनेको विधेयक, प्रदेश संचार माध्यम व्यवस्थापन ऐन, २०७५ लाई संशोधन गर्न बनेको विधेयक र प्रदेश अनुसन्धान व्युरो सेवाको गठन, स्थापना, काम, कर्तव्य र अधिकार सम्बन्धमा व्यवस्था गर्न बनेको विधेयकलाई दफावार छलफलका लागि समितिमा पठाएको छ ।
