हेटौंडाः बागमती प्रदेश सरकारको मन्त्रीपरिषद् बैठक सोमबार बसेको छ । मन्त्रीपरिषद्को बैठकले प्रदेश किताब खाना स्थापना गर्ने निर्णय गरेको छ । प्रदेश सरकार मातहतको कर्मचारीको यकिन विवरण राख्न प्रदेश किताब खाना स्थापना गर्ने निर्णय गरेको बागमती प्रदेश सरकारका प्रवक्ता एवम् आन्तरिक मामिला तथा कानुन मन्त्री कृष्णप्रसाद खनालले जानकारी दिनुभयो ।
यस्तै पहूँचका आधारमा बहुवर्षीय योजनासम्बन्धी निर्णय हुने प्रवृत्ति रोक्न स्रोतको सुनिश्चितता, योजनाको आवश्यकता र औचित्य पुष्टि गर्ने गरी बहुवर्षीय योजना मापदण्ड पारित गरेको प्रवक्ता खनालले जानकारी दिनुभएको छ । प्रदेश सरकारले स्वदेशी तथा विदेशी निजीक्षेत्रसँगको सहकार्यमा रासायनिक मल कारखाना खोल्ने तयारीस्वरुप छलफल अगाडि बढाउने निर्णय गरेको उहाँले जानकारी दिनुभयो । चेपाङ समुदायको न्वागी पर्व र विभिन्न जातीय समुहले मनाउने ल्होछार पर्वको अवसरमा प्रदेशभर सार्वजनिक विदा दिने निर्णय पनि गरेको छ ।
