हेटौंडाः मकवानपुर प्रहरीले अवैध रुपमा नदिजन्य पदार्थ उत्खनन् गर्ने ३२ वटा ट्याक्टरलाई नियन्त्रणमा लिएको छ । सोमबार ११ बजेर ४० मिनेटको समयमा ईलाका प्रहरी कार्यालय मनहरी मकवानपुरबाट खटिएको प्रहरी टोलीले गस्ती गर्दै जाने क्रममा मनहरी–८ स्थित मनहरी खोलाबाट ७ वटा ट्याक्टरलाई नियन्त्रण लिएको प्रहरीले जनाएको छ ।
प्रहरीले ना ५ त ९५४४, ना ६ त ४७९०, ना ५ त ७११२, ना ६ त २९१७, ना ५ त ५१३४, ना ६ त ५२३७ र ना ५ त ७०३१ नम्बरको ट्याक्टरले नदिबाट ग्राबेल उत्खनन् गरी लोड गरिरहेको अवस्थामा फेला पारी नियन्त्रणमा लिएको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिनुभयो । सबै ट्याक्टरलाई नियन्त्रणमा लिई आवश्यक कारबाहीका लागि मनहरी गाउँपालिकाको कार्यालय पठाइएको उहाँले बताउनुभयो ।
मकवानपुर प्रहरीले मंसिर १ गतेदेखि हालसम्म अबैध रुपमा नदिजन्य पदार्थ उत्खनन् गर्ने जम्मा ३२ ट्याक्टरलाई नियन्त्रणमा लिई आवश्यक कारवाहीका लागि सम्बन्धित निकायमा पठाईएको प्रहरी जनाएको छ ।
