हेटौंडाः नेपाली कांग्रेसको १४ औं महाधिवेशनअन्तर्गत बागमती प्रदेश समितिको निर्वाचन प्रक्रियामा मतदान सुरु भएको छ । निर्वाचन समितिले निर्धारण गरेको कार्यतालिका भन्दा झण्डै ८ घण्टापछि शनिबार अपरान्ह ४ बजे मतदान सुरु भएको हो ।
प्रदेश समितिको पदाधिकारी तथा सदस्यको संख्या धेरै हुनुका साथै तीन वटा प्यानलबीच भिडन्त हुने स्थितिमा मतपत्र ठूलो बनाउनु पर्ने र मतपत्र छपाइमा पनि ढिलाई भएसँगै मतदानको प्रक्रिया ढिलो गरी सुरु भएको निर्वाचन समितिले जनाएको छ । हेटौंडा–१० स्थित वनविज्ञान क्याम्पस परिसरामा जारी अधिवेशनमा निर्वाचन समितिले ९ वटा मतदान केन्द्र बनाएको छ । बागमती प्रदेशका १३ जिल्लाबाट २ हजार १ सय ३७ मतदाताले प्रदेश समितिका पदाधिकारी तथा सदस्यका लागि मतदान गर्नेछ ।
बागमती प्रदेश समितिको निर्वाचनमा प्रदेश सभापति पदका लागि नेपाली कांग्रेसका सभापति शेरबहादुर देउवा पक्षबाट ईन्द्रबहादुर बानियाँ, संस्थापनइतर समूहबाट जगदिश्वर नरसिंह केसी र कृष्ण सिटौला समूहबाट भीमसेनदास प्रधान प्रदेश सभापतिको उम्मेदवार बन्नु भएको छ । पदाधिकारीसहित ९१ पदका लागि २ सय ५७ जनाको उम्मेदवारी परेको छ ।
