हेटौडाः चार दलको समर्थनमा नेकपा एकीकृत समाजवादी बागमती प्रदेशको संसदीय दलको नेता राजेन्द्र पाण्डे आज मुख्यमन्त्री बन्दैछन् । नेपाली कांग्रेसको २२ सांसद, माओवादीको २३ सांसद, एकीकृत समाजवादीको १३ र जसपाको १ सांसदको समर्थनमा पाण्डेले मुख्यमन्त्रीमा आफ्नो दाबी प्रदेश प्रमुख यादव चन्द्र शर्मा समक्ष बुधबार पेश गरिसकेका छन् ।
नेकपा एमाले विभाजन भएर बनेको समाजवादीको नेता राजेन्द्र पाण्डेको नेतृत्वमा आज नयाँ सरकार बन्दैछ । पहिलो चरणमा मुख्यमन्त्रीमा पाण्डेसहित चार सदस्यीय मन्त्रिमण्डल विस्तार हुनेछ । मुख्यमन्त्री पाण्डेसँगै कांग्रेस ससदीय दलका उपनेता कृष्ण भँडेल, माओवादी केन्द्रका उपनेता कुमारी मोक्तान र नेकपा एकीकृत समाजवादीका उपनेता कृष्ण खनाल मन्त्री बन्ने कांग्रेस बागमती प्रदेश सभा संसदीय दलका सचिव निमा लामाले जानकारी दिनुभयो । मन्त्रालय भागवण्डाको विषयमा भने छलफल जारी रहेको उहाँको भनाइ छ ।
स्रोतका अनुसार कांग्रेसले भौतिक पूर्वाधार, माओवादीले आर्थिक मामिला र समाजवादीले सामाजिक विकास मन्त्रालय पाउँदैछ । बागमती प्रदेशमा अहिले आठ वटा मन्त्रालय छ । गठबन्धन दलबीच भाग पुर्याउन ८ मन्त्रालय फुटाएर ११ अथवा १३ मन्त्रालय बनाउने विषयमा छलफल भइरहेको बताइएको छ ।
१३ मन्त्रालय बनाउँदा कांग्रेस र माओवादीले ५/५ मन्त्रालय लिने र समाजवादीलाई ३ मन्त्रालय दिने विषयमा गठबन्धनबीच सहमति भइसकेको छ । बागमतीमा १०९ सांसद छन् । एमालेका ४३, कांग्रेसको २२, नेकपा माओवादीको २३ र एकीकृत समाजवादीका १३ सांसद छन् । यसैगरी, विवेकशील साझाको ३, नेमकिपा २, राप्रपा २ र एक स्वतन्त्र सांसद छन् । नेकपा एमाले विभाजन भएपछि अल्पमतमा परेर एमालेबाट भदौ २ गते बुधबार मुख्यमन्त्री बन्नुभएको अष्टलक्ष्मी शाक्यले बुधबार संसद् बैठकलाई सम्बोधन गरेर राजीनामा घोषणा गर्नुभएको थियो । उहाँले राजीनामा दिएसँगै नयाँ सरकार गठन गर्न बाटो खुल्ला भएको हो ।
