हेटौंडाः मकवानपुर उद्योग वाणिज्य संघ (मउवासंघ)को वार्षिक साधारणसभा सुरु भएको छ । आइतबार हेटौंडामा संघको ५४ र ५५ औं वार्षिक साधारणसभाको सुरुवात भएको हो । सभा आज सोमबारसम्म चल्नेछ भने संघको निर्वाचन कात्तिक ९ गते मंगलबार हुनेछ ।
मउवासंघका अध्यक्ष कृष्ण कटुवालको अध्यक्षतामा भएको वार्षिक साधारणसभामा नेपाली कांग्रेस बागमती प्रदेशका संसदीय दलका नेता ईन्द्रबहादुर बानियाँको प्रमुख आतिथ्यता थियो । कोभिड १९ का कारण प्रतिनिधिमूलक उपस्थिति गराएर भर्चुअलरुपमा साधारणसभा गरिएको हो । वार्षिक साधारणसभामा संघले विभिन्न क्षेत्रका संघसंस्थालाई सम्मानसमेत गरेको छ ।
वार्षिक साधारणसभाको अवसरमा झण्डै ४ करोडको लागतमा तयार भएको पल्पसा अतिथि गृहको समेत उद्घाटन भएको छ । कांग्रेस बागमती प्रदेशको संसदीय दलको नेता ईन्द्रबहादुर बानियाँले पल्पसा सदनको उद्घाटन गर्नुभएको हो । सो भवनमा ३० वटा कोठा रहेको छ । उद्योग वाणिज्य संघको निर्वाचनपश्चात् पल्पसा सदन पूर्णरुपमा सञ्चालनमा आउनेछ । आन्तरिक आयस्रोत वृद्धि गर्न उद्योग वाणिज्य संघले नै अतिथि गृह सञ्चालन गर्ने भएको हो ।
वार्षिक साधारणसभामा बागमती प्रदेशका सांसदहरु कुमारी मोक्तान, मुनु सिग्देल, प्रेमबहादुर पुलामी, मकवानपुरका प्रमुख जिल्ला अधिकारी भरतमणि पाण्डेलगायतको उपस्थिति रहेको थियो ।
आज उम्मेदवारी दर्ता
मंगलबार हुने मकवानपुर उद्योग वाणिज्य संघको निर्वाचनका लागि आज सोमबार उम्मेदवारी दर्ता हुने भएको छ । आज उम्मेदवारी दर्ता गर्ने फिर्ता लिने समय तोकिने र मंगलबार निर्वाचन गर्ने तयारी भएको छ ।
मकवानपुर उद्योग वाणिज्य संघको अध्यक्षका आकांक्षी तीन जना देखिएका छन् । संघको पूर्वअध्यक्ष राजकुमार न्यौपाने, वर्तमान उपाध्यक्ष कृष्णकुमार गुप्ता (अग्रवाल) र पूर्व महासचिव महेन्द्र राउतले उम्मेदवारी दिने तयारी भएको छ । तीनै जनाले प्यानल नै जित्ने दाबी गर्दै आएका छन् ।
यसैबीच संघको वर्तमान उपाध्यक्ष कृष्णकुमार गुप्ताको नागरिकता नक्कली भएको समाचार सम्प्रेषण गरेर झुटो हल्ला फिजाए पनि यसबारे सत्यता नभएको गुप्ताले प्रष्ट पार्नुभएको छ । नागरिकताको कुरा चुनावमा उठ्ने, आफ्नो गुटमा आउँदा नहुने, अरुको गुटमा पुगे नक्कली भयो भन्ने हल्लाको पछाडि नलाग्न गुप्ताले आग्रह गर्नुभएको छ ।
करिब ४ दशकदेखि मकवानपुर उद्योग वाणिज्य संघको विभिन्न पदमा रहेका काम गरेको अनुभव बोकेका गुप्ताले एक कार्यकालमात्र आफू अध्यक्ष बन्ने प्रतिबद्धता गर्नुभएको छ । संघको नेतृत्व गर्ने चाहना सबैको हुने भएकाले एक कार्यकाल आफूले नेतृत्व गर्ने र अरुलाई आफूले बाटो खुला गर्ने उहाँले बताउनुभयो ।
सानो व्यापारबाट सुरु गरेर आज ठूलो व्यापारिक सञ्जाल निर्माण गर्न सफल गुप्ताले व्यवसायीको हक हितलाई नयाँ उचाईमा पुर्याउनुभएको दावी गर्नुभएको छ । उहाँले व्यवसायीको अमूल्य मत खेर नफाल्न पनि आग्रह गर्नुभयो । आफ्नो कार्यकालमा मकवानपुर उद्योग वाणिज्य संघको गरिमालाई थप उचाईमा पुर्याउने उहाँको भनाई छ ।
