हेटौंडाः मकवानपुर बेरोजगार युवा संगठनको आयोजनामा हेटौंडा–९ मा जारी टोलस्तरीय सेभेन ए साइड फुटबल प्रतियोगिताअन्तर्गत् शनिबार भएको खेलमा त्रिवेणी टोल विकास संस्थाले उत्कृष्ट सुरुवात गरेको छ । प्रतियोगितामा आफ्नो पहिलो खेलमा त्रिवेणीले माल्दिभ्स टोल विकास संस्थाको पोस्टमा आधा दर्जन गोल गरेको छ ।
शनिबारको तेस्रो खेलमा त्रिवेणीले माल्दिभ्सलाई ६–० गोलअन्तरले पराजित गरेको हो । यसअघि शनिबार नै भएको पहिलो खेलमा धर्मपथ टोल विकास संस्थालाई स्वागत टोल विकास संस्थाले १–० गोलअन्तरले पराजित गर्यो । दोस्रो खेलमा शान्तिचोक टोल ‘बी’ सँग साविक उपविजेता कुष्माण्ड टोल २–० गोलले हार व्यहोर्दै प्रतियोगिताको पहिलो चरणबाट नै बाहिरिएको छ ।
शनिबारकै चौथो खेलमा मिलन टोलले सन्तोषी टोललाई ३–० गोलअन्तरले पराजित गरेको छ । पाँचौ खेलमा प्रगतिशील टोललाई ट्राइब्रेकरमा २–१ गोलले पराजित गर्दै ओम टोल विजयी भएको छ । निर्धारित ४० मिनेटको खेल १–१ गोलको बराबरीमा सकिएपछि खेल ट्राइब्रेकरमा धकेलिएको थियो ।
आइतबार प्रतियोगिताको थप ४ खेल हुँदैछ । आइतबारको पहिलो खेलमा दिव्यपथ टोलले सेतीदेवी टोलको सामना गर्दा दोस्रो खेलमा साविक विजेता शान्तिचोक टोल ‘ए’ र खाद्य संस्थान टोल प्रतिस्पर्धा गर्दैछन् । तेस्रो खेलमा प्रगति टोल र संवेदनशील टोल भिड्दैछन् भने चौथो खेल त्रिवेणी टोल र धाप टोलबीच हुने आयोजकले जनाएको छ ।
