हेटौंडाः हेटौंडा–४ स्थित नवोदय शिशु सदन अंग्रेजी माध्यमिक विद्यालयमा भर्चुअल प्रविधिबाट नवोदय डान्सिङ स्टार प्रतियोगिता बुधबार सम्पन्न भएको छ । बुधबार भएको फाइनल राउण्डमा अश्मी घिमिरे, अपेक्षा विडारी, समिक्षा उप्रेती र दर्शना सापकोटा उत्कृष्ट घोषित भएका छन् ।
५० प्रतिशत भोटिङ र ५० प्रतिशत निर्णायकको आधारमा उत्कृष्ट तीन घोषित गर्ने निर्णय भएको थियो । जसमा भोटिङ र निर्णायकको आधारमा अपेक्षा विडारी र समिक्षा उप्रेतीले समान अंक हासिल गर्न सफल भएको क्रियटिभ आर्ट (सीएका) शिक्षक पर्वत राईले जानकारी दिनुभयो । ४४ जना विद्यार्थीबाट उत्कृष्ट २० बाट उत्कृष्ट १०, उत्कृष्ट ६ हुँदै बुधबार नवोदय डान्सिङ स्टार छनौट गरिएको हो । भौतिक रुपमा विद्यालय सञ्चालन भएपछि उत्कृष्ट छनौट भएका विद्यार्थीलाई पुरस्कृत गरिने विद्यालयले जनाएको छ ।
प्रतियोगितामा राष्ट्रिय नृत्य निर्देशक महासंघका केन्द्रीय सदस्य सुरेन देसार, नवोदय विद्यालयका नृत्य शिक्षक पर्वत राई र विष्णुसेन ठकुरीले निर्णायकको भूमिका निर्वाह गरेका थिए । कार्यक्रममा प्रमुख अतिथि रहेका विद्यालयका निर्देशक दीपेश जोशीले प्रतियोगिताले विद्यार्थीको प्रतिभा प्रस्फुटन गर्ने भएकोले प्रतियोगितालाई निरन्तरता दिइने बताउनुभएको छ । क्रियटिभ आर्टका शिक्षकको संयोजनमा यसअघि नवोदय सिंगिङ स्टार प्रतियोगिता पनि सञ्चालन भएको थियो । कार्यक्रममा विद्यालयका शैक्षिक संयोजक अव्यक्त खनाललगायत विद्यार्थी, अभिभावक, शिक्षक-शिक्षिकाहरुको सहभागिता रहेको थियो ।
