हेटौंडाः हेटौंडा–७, नागस्वतीस्थित समृद्ध युवा बचत कोषको आयोजनामा रक्तदान कार्यक्रम भएको छ । सोमबार नागस्वती चोकमा भएको कार्यक्रममा ४० जनाले रक्तदान गरेका छन् ।
केही दिनयता रगतको अभाव भइरहेका बेला रक्तदान कार्यक्रम हुँदा राहत भएको रक्तसञ्चार केन्द्र हेटौंडाका प्रमुख टंक दाहालले जानकारी दिनुभएको छ । रगतको अभाव हुँदा बोलाएको बेला रक्तदान गर्न आउने रक्तदाता (अनकल डोनर) लाई रक्तसञ्चार केन्द्रमै बोलाएर रगत संकलनको कार्य गरिएको दाहालले बताउनुभएको छ ।
कोषका अध्यक्ष युवराज गौतमको अध्यक्षता तथा ७ न वडा अध्यक्ष राजन थापाको प्रमुख आतिथ्यमा भएको रक्तदान कार्यक्रममा नेपाल रेडक्रस सोसाइटी नागस्वती उपशाखाका सभापति ध्रुब प्रसाद चौलागाईंको पनि उपस्थिति रहेको थियो । समृद्ध युवा कोषले हेटौंडा–७, नागस्वतीमा समृद्ध पुस्तकालय समेत सञ्चालन गरिरहेको छ ।
