हेटौंडाः मकवानपुरका १३ व्यवसायीक संघको अध्यक्षहरुले व्यवसाय पूर्ण रुपमा खुल्ला गर्न प्रमुख जिल्ला अधिकारी भरतमणि पाण्डेसँग माग गरेका छन् । बिहीबार प्रमुख जिल्ला अधिकारी पाण्डेको कार्यकक्षमा पुगेर व्यवसायीक संघको अध्यक्षहरुले व्यवसायी र सहयोगीलाई खोपको व्यवस्थापन गर्न, व्यवसायी तथा उद्योगीहरुलाई बैंकको ब्याज तथा किस्ता भुक्तानी र घर भाडा छुटको व्यवस्था गर्ने माग राखेका छन् ।
घर बहाल कर तथा व्यवसाय नविकरणमा पूर्ण छुट हुनुपर्ने तथा विना जानकारी समय समयमा लोड सेडिङ अन्त्य गर्न प्रमुख जिल्ला अधिकारीको ध्यानाकर्षण गराएका छन् ।
कपडा तथा तयारी पोशाक व्यवसायी संघ मकवानपुरका अध्यक्ष तेजराज अधिकारीले प्रमुख जिल्ला अधिकारीलाई व्यवसायीको माग राख्नुभएको थियो । प्रजिअ पाण्डेले व्यवसायीहरुलाई खोप लगाउन सकारात्मक भएको बताउनुभयो ।
उहाँले विभिन्न उमेर समुहका व्यक्तिहरुलाई खोप आउने र उनीहरुलाई लगाएर बाँकी भएर व्यवसायीलाई पनि लगाउने बताउनुभएको छ । उहाँले व्यवसायीलाई छुटको लागि सिफारिस लिएर सम्बन्धीत निकायमा जान जिल्ला कोभिड–१९ संकट व्यवस्थापन समितिले निर्णय गरिसकेको जानकारी गराउनुभयो । त्यस्तै कोभिड संक्रमण ५ सय बढी भएकोले जिल्लामा निषेधाज्ञा अहिले नखुल्ने प्रष्ट गर्नुभयो । मदिरा, यातायात बाहेक अन्य व्यवसायहरु निश्चित समय खोल्न दिइएको भन्दै त्यसैलाई व्यवस्थापन व्यवसायलाई आग्रह गर्नुभएको छ । सरकारले मदिरा, शैलिन, ब्यूटपार्लर, मनोरञ्जन सरकारले नेगेटिभ लिस्टमा राखेकोले अहिले नखुल्ने बताउनुभयो । उहाँले आउँदो साउन १ गतेदेखि व्यवसाय खोल्ने समय केही हेरफेर हुन सक्ने बताउनुभएको छ ।
