हेटौंडाः बागमती प्रदेश सभामा शुक्रबारबाट आगामी आर्थिक वर्ष ०७८÷७९ को नीति तथा कार्यक्रम माथि छलफल सुरु भएको छ । छलफलमा भाग लिदै सांसद शालिकराम जम्मकट्टेलले हावादारी नीति तथा कार्यक्रम आएको बताउनुभयो । उहाँले विद्धानले लेखेको शब्दजालको नीति कार्यक्रम आएको भन्दै गुनगाई मात्र गाइएको बताउनुभयो।
एउटै कुरा धेरै बुँदामा दोहोरिएर आएको उहाँको भनाई छ । उहाँले छलफल नै नगरी बहुवर्षीय योजनाहरुको लागि बजेट सिलिङ जिल्ला जिल्लामा पठाएकोमा आपत्ति जनाउनुभयो ।
भीमफेदी–कुलेखानी सुरुङमार्ग निर्माण गर्न आफु विरोधी नभएको बताउँदै संघीय सरकारले पूर्वाधार विकास समितिलाई दिएको अनुमति खारेज नभई अगाडि बढ्न नहुने र मकवानपुर तथा काठमाडौंका नागरिकसँग शेयरको नाममा उठाइएको रकमको जिम्मा प्रदेश सरकारले लिनुपर्ने उहाँको भनाइ छ ।
उहाँले कमिसनको चक्करमा नलाग्न पनि सरकारलाई आग्रह गरेका छन् । विद्युतीय सवारी खरिद प्रक्रिया अघि बढाएर जनताको पैसा नफसाउन उहाँले आग्रह गर्नुभयो । उपलब्धी नै नभएको नीति तथा कार्यक्रम समर्थन गर्न नसक्ने उहाँले स्पष्ट गर्नुभएको छ ।
यता सांसद राजेन्द्र पाण्डेले पनि सुरुङमार्ग निर्माण गरेर अहिले १८ अर्ब बजेट विनियोजन गरेर काम गर्नु उचित नभएको बताउनुभयो । यो सरकारको समय नभएकोले ११ महिनामा अर्को आउने सरकारले निरन्तरता दिन नसक्ने भएका कारण भीमफेदी कुलेखानी सुरुङमार्गमा प्राथमिकता नभएको बताउनुभयो । उहाँले बजेट विनियोजन गर्न आवश्कय नभएको बताउनुभयो ।
विद्युतीय बस संचालन गरेर सरकारले चालउने विषयमा पनि प्रतिस्पर्धाका बिचमा सरकारले विद्युतीय बस चलाउन नसक्ने उहाँले बताउनुभयो ।
सांसद मुनु सिग्देलले पनि विद्युतीय बस खरिद सरकारले गर्ने र चार्जिङ स्टेशन नीजि क्षेत्रलाई बनाउन दिने भन्दा पनि सरकारले चार्जिङ स्टेशन निर्माण गरेर नीजि तहलाई बस चलाउन दिनुपर्ने बताउनुभयो ।
सांसद प्रभाव तामाङले भने नीति तथा कार्यक्रम वैद्यता नआएको बताउनुभयो । उहाँले जेठ १४ मा प्रधानमन्त्रीले देशको नाममा सम्बोधन गरेको र जेठ १५ मा अर्थमन्त्रीले प्रस्तुत गरेको आगामी ७८÷७९ बजेट बक्तव्यलाई आधार मानेर नीति कार्यक्रम प्रस्तुत गरेकोले यसको वैद्यता प्रष्ट गर्न सरकारसँग माग गरे ।
सांसद रमेश पौडेलले पनि हावदारी नीति र कार्यक्रम आएकोले विश्वास योग्न नभएको बताउनुभयो ।
सांसद नरोत्तम वैद्यले भने आगामी वर्षमा सांसदहरुलाई बाड्ने ३ करोड र समानुपाति सांसदलाई दिने गरेको १ करोड रुपैयाँ बजेट विनियोजन नगर्न सुझाव दिनुभयो । उहाँले यो रकमले कोभिड भ्याकसिन किनेर प्रदेशबासीलाई लगाउनु पर्ने माग गर्नुभयो ।
सांसद विशाल खड्काले भने सुशासन फोकस नीति तथा कार्यक्रम नआएको भन्दै समर्थन गर्न नसक्ने बताउनुभयो ।
सांसद विराजभक्त महर्जनले प्रदेश सरकारले राजश्व बढाउने भनेर ल्याएको नीतिको विरोध गर्नुभयो । राजश्व बढ्दा महंगी बढ्ने हेक्का सरकारले नराखेको उहाँको भनाई थियो । कोभिड आम नागरिक थलिएको बेला सरकार राजश्व बढाउने तिर लागेको भन्दै सेवा दिने कुरा नगरेकोमा उहाँले आपत्ति जनाउनुभयो । संघ सरकार चुरेको ढुंगा गिटी बालुवा बेच्नुपर्छ भन्छ प्रदेश नीतिमा यसलाई बचाउनुपर्छ भनेर दुई चरित्र देखाएको उहाँले बताउनुभयो । गत ४ वर्षमा ल्याएको नीति कार्यक्रमको समिक्षा गरेर सार्थ नीति कार्यक्रम ल्याउनुपर्ने उहाँले जोड दिनुभयो ।
शुक्रबार ४५ सांसदहरुले छलफलमा बोलेका छन् । उनीहरुले आगामी नीति तथा कार्यक्रमबारे चर्का आलोचना गरेका थिए । लगातार पौने ५ घण्टा चलेको प्रदेश सभा वैठक शनिबार बिहान ११ बजेसम्मको लागि स्थगित भएको छ ।
