हेटौंडाः हेटौंडा उपमहानगरभित्र भोलि शनिबारबाट होटल, लज, रेष्टुरेन्ट, चिया पसल, मिठाई पसल बन्द हुने भएको छ । यस्तै उनीहरुले टेक अवे र होम डेलिभरी सेवा भने बिहान १० बजेदेखि बेलुका ६ बजेसम्म दिन पाउँनेछ ।
शुक्रबार जिल्ला कोभिड–१९ संकट व्यवस्थापन केन्द्र(डिसीसीएमसि) को बैठकले हेटौंडा बसपार्क क्षेत्रको सबै किराना पसल, चिया पसलमा धेरै भीडभाड भएको भन्दै सबै अर्का सुचना नभएसम्मको लागि बन्द गर्ने निर्णय गरेको हो । अत्याधिक भीडभाडको कारण जोखिम बढ्न सक्ने भन्दै यसतो निर्णय गरिएको प्रमुख जिल्ला अधिकारी भरतमणी पाण्डेले जानकारी दिनुभयो ।
यसैगरी औद्योगिक क्षेत्रका उद्योगहरुमा कार्यरत कर्मचारीहरुलाई उद्योग भित्रै राख्नुपर्ने भएको छ । उनीहरुलाई बाहीर आवतजावत गर्न रोक लगाएको छ । यसैगरी गौरिकटर आइसोलेसन सेन्टरमा हाल २० बेडको अक्सिजन सहितको सेवा सञ्चालन भएपनि त्यसलाई बढाएर २ सय बेडसम्म बनाउन आवश्यक स्वास्थ्य सामाग्री सहितको व्यवस्थापन गर्न प्रदेशको सामाजिक विकास मन्त्रालयलाई आग्रह गर्ने निर्णय बैठकले गरेको प्रमुख जिल्ला अधिकारी भरतमणी पाण्डेले बताउनुभयो ।
