हेटौंडाः हेटौंडामा कोरोना संक्रमित भएका जटिल बिरामीलाई राख्नका लागि हेटौंडा अस्पतालमा छुट्टै आईसीयूको व्यवस्था गरिएको छ । संक्रमित बिरामीको राम्रै उपचार भएपनि बाहिर बिरामी कुर्न बसेका आफन्त भने कस्तो अवस्थामा छन् भन्ने कसैको ध्यान गएको छैन ।
अस्पताल बाहिर आफ्नो बिरामीका लागि बसेका कुरुवाहरुलाई दिनमा भन्दा पनि रातको समयमा अझै समस्या हुने गरेको छ । अस्पतालले कुरुवाको लागि कुनै पनि व्यवस्था नगरिदिँदा आफन्तहरु अस्पताल बाहिरको पेटीमा रात बिताउन बाध्य भएका छन् । कोरोना संक्रमणको डर त छँदै छ, हालको समयमा खुला स्थानमा र अझ भन्नुपर्दा अस्पतालको बरन्डा र पेटीमा रात बिताउन बाध्य आफन्तहरु डेङ्गु, मलेरियालगायतको रोगले आफैंलाई सताउने हो कि भन्दै गुनासो गरेका छन् ।
कोरोना संक्रमित ५० वर्षीय भाइलाई आईसीयूमा भर्ना गरेर बाहिर कुरेर बस्नुभएकी हेटौंडा–४ की मन डीसीले दिनभरी बाहिर पेटीमा बस्नु परेको र रातमा पनि अस्पताल बाहिरको बरन्डामा सुत्ने गरेको बताउनुभयो । कोरोना संक्रमित बिरामी उपचार गर्न आईसीयूको व्यवस्था हेटौंडामा नै हुनु सबैभन्दा राम्रो काम भएको उहाँले बताउनुभयो । तर बिरामी कुरुवाका लागि भने एउटा बेन्चको पनि व्यवस्था नहुँदा समस्या भइरहेको उहाँको भनाई छ ।
आफ्नो भाइलाई बैशाख १ गतेदेखि नै ज्वरो आएको र पानीले भिजेको कारणले ज्वरो आएको होला भनेर सामान्यरुपमा लिइएको डीसीले बताउनुभयो । ५ गते निजी अस्पतालमा जचाउँदा टाइफाइट देखिएको उहाँले जानकारी दिनुभयो । केही दिन औषधी प्रयोग गर्दा पनि ज्वरो कम नभएपछि छातीको एक्सरे जाँच गर्दा निमोनिया देखिएपछि सिटी स्क्यान गर्दा कोरोना देखिएको उहाँले बताउनुभयो । स्वास्थ्य अवस्था बिग्रँदै गएपछि हेटौंडा अस्पताल ल्याउँदा अस्पतालले भर्ना लिन नमानेको उहाँले जानकारी दिनुभयो ।
त्यसपछि चुरेहिल अस्पताल लग्दापनि भर्ना लिन नमानेपछि समाचारबाट हेटौंडा अस्पतालमै आईसीयू बन्दै गरेको थाहा पाएर पहिलो बिरामीको रुपमा आफ्नो भाइलाई भर्ना गरिएको उहाँको भनाई छ । भर्ना गरेपछि कोरोना परीक्षण गर्दा संक्रमण देखिएको डीसीले बताउनुभयो । हाल भाइको स्वास्थ्यमा सुधार आएको भनेर जानकारी आएपछि आफूले बाहिर झेल्नुपरेको समस्यालाई भुलेर केही खुसी मिलेको पनि उहाँले बताउनुभयो । उहाँले भन्नुभयो, ‘बिरामीको उपचार सबै डाक्टर नर्सले सुरक्षितसाथ गर्नुहुन्छ । सन्तोषजनक व्यवहार गर्नुहुन्छ । हेटौंडामा यस्तो सुरक्षित उपचार पाउँदा खुसी लाग्छ, तर हामी बिरामी कुरुवा भने दिन–रात नै अस्पतालको पेटीमा बस्नुपर्ने अवस्था रहेको छ ।’
आफ्नी ६८ वर्षीया आमालाई कोराना संक्रमणकै कारण आईसीयूमा भर्ना गर्नुभएका हेटौंडा–५ का मिलनकुमार कार्कीले पनि अस्पतालबाहिर कुरुवाको रुपमा उस्तै समस्या झेल्नुपरेको बताउनुभयो । दमको बिरामीसमेत हुनुभएको आमालाई शनिबारबाट श्वासप्रश्वासमा समस्या भएपछि हेटौंडा अस्पतालमा ३ दिनसम्म आकस्मिक कक्षमा राख्नुपरेको कार्कीले जानकारी दिनुभयो । सो क्रममा कोरोना जाँच गराउँदा संक्रमण देखिएपछि मंगलबार आईसीयूमा सारिएको र अहिले अक्सिजन लगाएर राखिएको बताउनुभयो ।
हेटौंडा अस्पतालको आईसीयूमा हाल १० जनालाई अक्सिजन दिएर उपचार भइरहेको छ । बिहीबार ९ जना उपचाररत रहेकोमा एकजना सङ्क्रमणमुक्त भएर डिस्चार्ज भए पनि साँझ पुनः २ जना थपिएका हुन् । जसमध्ये ९ जना हेटौंडा उपमहानगरपालिकाका र १ जना महोत्तरी जलेश्वरबाट रिफर भएर उपचारका लागि हेटौंडा ल्याइएको हो ।
आईसीयूमा रहेका सबैलाई अक्सिजन दिएर राखिएको उपचारमा खटिनुभएकी डा. नेहा गुप्ताले जानकारी दिनुभयो । जसमध्ये २ जनाको अवस्था गम्भीर रहेको र उनीहरुलाई भेन्चुरी अक्सिजन प्रदान गरिएको उहाँले जानकारी दिनुभयो । यस्तै १ जना बिरामीलाई भने हेटौंडाबाट चितवन रिफर गरिएको जनाइएको छ । अन्यको स्वास्थ्य अवस्थामा सुधार भइरहेको डा. गुप्ताले जानकारी दिनुभयो ।
मकवानपुरमा बिहीबारसम्म कोभिड–१९ का सक्रिय संक्रमितको संख्या २ सय ९३ जना छन् । जसमा २ सय ७८ जना होम आइसोलेसन, १० जना हेटौंडा अस्पतालको कोभिड ट्रिटमेन्ट वार्डमा र ६ जना हेटौंडा ६ स्थित गौरीटार आइसोलेसनमा उपचाररत रहेका छन् ।
