हेटौंडाः बागमती प्रदेशको मुख्यमन्त्री डोरमणि पौडेलले बोलाएको सर्वदलीय बैठकमा ठूला दलहरु नै सहभागि भएनन् । ललिपुरको जाउलाखेलस्थित प्रदेश सुशासन केन्द्रमा आज बसेको सर्वदलीय बैठकमा नेकपा माओवादी, नेपाली कांग्रेस र विवेकशील साझा दलले सहभागिता नजनाएको नेकपा एमाले संसदीय दलका नेता केशवराज पाण्डले जानकारी दिनुभयो ।
सर्वदलीय बैठक के को लागी थाहा नभएको नेकपा माओवादी बागमती प्रदेशको संसदीय दलका नेता शालिकराम जम्कट्टेलले बताउनुभयो । सदन चलाउने विषयमा त्यति गम्भिर नदेखिएको तर सर्वदलीय बैठक बोलाइएको भन्दै उहाँले सहभागिता नजनाएको जानकारी दिनुभयो । यता विवेकशील साझा दलको नेता रमेश पौडेलले भने बैठकमा उपस्थित हुन जानकारी आएको तर बैठकको एजेन्डा बारे नै थाहा नहुँदा सहभागिता नजनाएको बताउनुभयो ।
सर्वदलीय बैठकमा राप्रपा, नेपाल मजदुर किसान पार्टी र एमाले पार्टीको मात्र सहभागिता थियो । बैठकमा आगामी वर्षको नीति तथा कार्यक्रम र बजेटको विषयमा छलफल नै नभएको बैठकमा सहभागि राप्रपाकी प्रदेश सभा सदस्य रीता माझिले बताउनुभयो । उहाँले प्रदेश सभाको सदन राम्रोसँग चलाउनुपर्नेमा जोड दिनुभयो यस्तै आज बसेको बैठकले कोरोना भाइरसको सङ्क्रमण बढ्न नदिन सरकारले धेरै भिडभाड हुने कार्यक्रम रोक्नुपर्ने र नागरिकलाई पनि भिडभाड हुने कार्य गर्न दिन नहुने निष्कर्ष निकालेको छ । बैठकमा बागमती प्रदेशको आर्थिक मामिला तथा योजना मन्त्री कैलाश ढुंगेल, भौतिक पूर्वाधार विकास मन्त्री रामेश्वर फुयाँल लगायतको सहभागिता रहेको थियो ।
