हेटौंडाः देशव्यापी चर्चामा आएको सुस्मिता केसी (थापा) को हत्यासम्बन्धी मुद्धाकोे पेशी सोमबारका लागि तोकिएको छ । जिल्ला अदालत मकवानपुरले चैत ९ गते सोमबारका लागि मुद्धाको सुनुवाईका लागि पेशी तोकेको जिल्ला अदालत मकवानपुरका श्रेस्तेदार तीर्थराज भट्टराईले जानकारी दिनुभयो ।
सुस्मिता हत्यासम्बन्धी मुद्धामा थापाको तर्फबाट थुप्रै कानुन व्यवसायीले बहस गर्दै आएका छन् । अधिवक्ता मदन दाहालको अगुवाईमा केसीको पक्षमा २० जना कानुन व्यवसायीले बहस गरिरहेको छ । सुस्मिताको हत्याको आरोप लागेकाहरुविरुद्ध आवश्यक प्रमाण जुटिसकेको हुँदा अब छिटै मुद्धाको फैसला हुने बताइएको छ ।
हेटौंडा–४, कर्रास्थित सूर्यचोकमा आफ्नै घरमा केसीको हत्या भएको थियो । गत असार १ गते राति उनको हत्या भएको थियो । सुस्मिताको हत्यामा परिवारका सदस्यकै संलग्नता रहेको प्रहरी अनुसन्धानले देखाएपछि हत्या भएको करिब दुई हप्तापछि परिवारका सदस्यहरु पक्राउ परेका थिए ।
हत्यामा संलग्न भएको आरोपमा प्रहरीले सुस्मिताका ससुरा, सासु, नन्द र आमाजुलाई पक्राउ गरी थुनामा राखेको छ । सुस्मिताको ससुरालाई भीमफेदी कारागारमा राखिएको छ भने अन्य सदस्यहरुलाई चितवनको भरतपुर कारागारमा राखिएको छ । यस्तै हत्यामा संलग्नको आशंका गरिएका एकजना भने अहिलेसम्म फरार नै रहेका छन् ।
