हेटौंडाः मकवानपुरको पूर्वी क्षेत्र बागमती गाउँपालिकामा यही चैत्र १३ गतेदेखि २३ गतेसम्म चौँथो बागमती राष्ट्रिय गोल्डकप फुटबल प्रतियोगिता हुने भएको छ । चौँथो बागमती राष्ट्रिय गोल्डकप फुटबल प्रतियोगिताको पुरस्कार राशि यसवर्ष केही बढाइएको छ ।
गतवर्ष बागमती गोल्डकपको तेस्रो संस्करणको विजेताले नगद ६ लाख रुपैयाँ प्राप्त गरेका थिए । उपविजेता हुने समूहले ३ लाख रुपैयाँ प्राप्त गरेका थिए ।
यही चैत्र १३ गतेबाट आयोजना हुने चौँथो बागमती राष्ट्रिय गोल्डकप फुटबल प्रतियोगितामा विजेताले नगद ८ लाख र उपविजेता बन्ने समूहले नगद ४ लाख रुपैयाँ प्राप्त गर्नेछन् । बागमती गाउँपालिका खेलकुद विकास समितिले गत वर्षको तुलनामा प्रथम पुरस्कारमा २ लाख र द्वितीय पुरस्कारमा १ लाख रुपैयाँ थप गरेको हो ।
वि.सं. २०७४ सालबाट बागमती गाउँपालिकामा बागमती राष्ट्रिय गोल्डकपको सुरुवात भएको हो । बागमती राष्ट्रिय गोल्डकपको पुरस्कार राशी वर्षेपिच्छे बढाउँदै लगिएको बागमती खेलकुद विकास समितिका अध्यक्ष भिमबहादुर राईले बताए ।
गोल्डकपको पहिलो संस्करणको विजेताले नगद १ लाख रुपैयाँ र उपविजेताले नगद ५० हजार रुपैयाँ प्राप्त गरेका थिए । यस्तै दोस्रो संस्करणको विजेताले नगद ३ लाख र उपविजेताले नगद १ लाख ५० हजार, तेस्रो संस्करणको विजेताले नगद ६ लाख र उपविजेताले नगद ३ लाख रुपैयाँ प्राप्त गरेका थिए ।
बागमती–८ को जनता माविको खेलमैदानमा हुने चौँथो बागमती राष्ट्रिय गोल्डकपको लागि बागमती गाउँपालिकाले ३५ लाख उपलब्ध गराउने भएको छ । खेलमा ७४ लाख खर्च हुने आयोजक बागमती खेलकुद विकास समितिले जानकारी दिएको हो ।
खेलमा ए डिभिजन क्बल ५ वटा, आयोजक टिम एक, जिल्ला तथा प्रदेश स्तरीय क्लब ४ वटा गरी जम्मा १० वटा टिमले सहभागिता जनाउँनेछन् । प्रतियोगितामा सहभागि हुने क्लबहरुको भने टुङ्गो लागिनसकेको आयोजकले जनाएको छ ।
