हेटौंडाः बागमती प्रदेशको राजधानी हेटौंडामा जारी स्थानीय तह शहीद स्मृति गोल्डकप फुटबलमा नेपाल आर्मी क्लब विजय भएको छ । शुक्रबार भएको खेलमा जावलाखेल युथ क्लबलाई पराजित गर्दै नेपाल आर्मी क्लब विजयी भएको हो ।
निर्धारित समय गोलरहित बराबरीमा सकिएपछि टाइब्रेकरमा खेलको निर्णय लिइएको थियो । टाइब्रेकरमा आर्मीले जावलाखेल युथ क्लबलाई ४–२ गोलअन्तरले पराजित गरेको हो । खेलको म्यान अफ द म्याच नेपाल आर्मी क्लबका गोलरक्षक विवश चौधरी घोषित भए ।
यस्तै, शनिबार नेपाल पुलिस क्लब र संकटा क्लब काठमाडौंबीच खेल हुनेछ । प्रतियोगिताको फाइनल खेल चैत ७ गते हुनेछ । प्रतियोगिताको विजेताले नगद १० लाख, उपविजेताले नगद ५ लाख रुपैयाँ तथा सर्वोत्कृष्ट खेलाडीले ३५० सीसीको बुलेट बाइक प्राप्त गर्नेछन् । हेटौंडा स्कूल अफ म्यानेजमेन्टले सर्वोत्कृष्ट खेलाडीको लागि बुलेट बाइकको प्रायोजन गरेको हो ।
