हेटौंडाः मकवानपुरको पूर्वी क्षेत्र बागमती गाउँपालिकामा जारी खुला नकआउट फुटबल प्रतियोगिताको फाइनलमा आयोजक ग्रामीण बहुउद्देश्यीय समाज नेपाल प्रवेश गरेको छ ।
मकवानपुरको बागमती गाउँपालिकाको झुरझरे खेल मैदानमा मंगलबार भएको सेमिफाइनल खेलमा पारिजात युवा क्लब बकैयालाई ३–१ गोल अन्तरले पराजित गर्दै आयोजक उपाधि नजिक पुगेको हो । अब आयोजकले फाइनलमा बकैया–५ र करौजे युवा क्लबबीचको विजेतासँग उपाधिका लागि प्रतिस्पर्धा गर्नेछ ।
ग्रामीण बहुउद्देश्यीय समाज नेपालको आयोजनामा बागमती झुरझुरे खेल मैदानमा जारी प्रतियोगितामा आयोजकका तर्फबाट जर्सी नम्बर ११ का प्रयास तामाङले खेलको ४९ औं मिनेटमा पहिलो गोल गर्दै खेललाई आग्रह लिएका थिए । आयोजकको जितमा गोलरक्षक गणेश राईको भूमिका पनि महत्वपूर्ण रह्यो । उनले खेलभर पारिजातका आधा दर्जनभन्दा बढी प्रहार बचाएका थिए । दर्शकको व्यापक समर्थन पाएको आयोजकले पहिलो हाफको तुलनामा दोस्रोमा उत्कृष्ट खेल खेलेको थियो ।
दोस्रो हाफमा आयोजकमाथि पारिजातले दबाब सिर्जना गरेको थियो । पारिजातका गोलरक्षक बिक्रम नेगीले खेलभर आयोजकका आधा दर्जनभन्दा बढी प्रहार बचाएका थिए । खेलको ६० औं मिनेटमा आयोजकका अमिर श्रेष्ठले अर्को गोल गर्दै फाइनलको तय गरेका थिए भने पुनः आयोजककै राज भुसालले ६२ औं मिनेटमा गोल गर्दै फाइनलको ढोका खोलेका हुन् ।
पारिजातका हिसुब थपलियाले ६४ औं मिनेटमा एक गोल गरे पनि टिमलाई जित दिलाउन सकेनन् । पारिजातले गोल गर्ने केही राम्रा अवसरको सदुपयोग गर्न नसक्दा फाइनल यात्रामा पूर्णविराम लाग्न पुग्यो । खेलको म्यान अफ द म्याच आयोजकका गोल रक्षक गणेश राई भएका थिए ।
प्रतियोगिताको विजेता टिमले १ लाख र उपविजेताले ५० हजार नगदसहित शिल्ड, मेडल र प्रमाणपत्र प्राप्त गर्नेछन् । उत्कृष्ट गोलरक्षक, स्ट्राइकर, प्लेयर अफ द टुर्नामेण्ट र म्यान अफ द म्याच हुने खेलाडीहरुलाई पनि पुरस्कार प्रदान गरिने आयोजकले जनाएको छ ।
