हेटौंडाः मकवानपुरको हेटौंडामा भोलि बिहीबारबाट सुरु हुने स्थानीय तह शहीद स्मृृति गोल्डकप फुटबलको तेस्रो संस्करण २०७७ को सम्पूर्ण तयारी पूरा भएको छ । प्रतियोगिताको आयोजक मकवानपुर जिल्ला फुटबल संघ रहेको छ ।
प्रतियोगिताको लागि आयोजकले ४ हजार जनाले खेल हेर्न सक्नेगरी मैदानमा फलामको प्याराफिटको निर्माण गरेकोे छ । चौरको सतह मिलाइएको छ भने चौरमा पानी हालेर हरियाली बनाइएको छ ।
मकवानपुर जिल्ला फुटबल संघले फागुन २७ गतेबाट चैत्र ७ गतेसम्म हुने प्रतियोगितामा दर्शकलाई टिकटको व्यवस्था गरेको छ । उद्घाटन खेल हुने दिनबाटै दर्शकले खेल हेर्न टिकट काट्नुपर्नेछ । नकआउट चरणमा प्रतिव्यक्ति एस सय रुपैयाँ, सेमिफाइनलमा प्रतिटिकट २ सय रुपैयाँ र फाइनल खेल हेर्न ३ सय रुपैयाँ टिकटको मूल्य तोकिएको छ ।
खेलकुदको माध्यमबाट शहीदहरुप्रति सम्मान प्रकट गर्ने, स्थानीय तहमार्फत् खेलको विकास गर्ने, मकवानपुरे खेलाडीहरुको क्षमता प्रष्फुटन गर्ने, खेल क्षेत्रबाट राष्ट्रिय र अन्तर्राष्ट्रियस्तरमा हेटौंडालाई चिनाउन खेलकुद प्रतियोगिता गरिँदै आएको मकवानपुर जिल्ला फुटबल संघ मकवानपुरका अध्यक्ष टीका लामाले जानकारी दिनुभयो ।
प्रतिदिन खेल खेल्ने टिमलाई नगद १० हजार तथा अन्तर्राष्ट्रिय टिमले खेल खेलेको दिन १ लाख आयोजकले उपलब्ध गराउने भएको छ । हेटौंडा उपमहानगरपालिका वडा नम्बर १० स्थित वन विज्ञान अध्ययन संस्थानको खेलमैदानमा हुने प्रतियोगिताको विजेताले नगद १० लाख रुपैयाँ र उपविजेताले नगद पाँच लाख रुपैयाँ पाउनेछन् । प्रतियोगितामा सर्वोत्कृष्ट खेलाडीले ५० हजार, विधागत उत्कृष्ट खेलाडीले २५ हजार, म्यान अफ दि म्याचले दश हजारका दरले पुरस्कार पाउनेछन् ।
प्रतियोगिताका लागि मकवानपुरका विभिन्न दशवटा स्थानीय तहले प्रायोजन गरेका छन् । हेटौंडा उपमहानगरपालिकाले १५ लाख तथा थाहा नगरपालिकाले १० लाख रुपैयाँ सहयोग गरेको छ । यस्तै बागमती गाउँपालिका, बकैया गाउँपालिका, मकवानपुरगढी गाउँपालिका, मनहरी गाउँपालिका, भीमफेदी गाउँपालिका, ईन्द्रसरोबर गाउँपालिका, कैलाश गाउँपालिका र मनहरी गाउँपालिकाबाट ५–५ लाख रुपैयाँ सहयोग प्राप्त भएको मकवानपुर जिल्ला फुटबल संघ अध्यक्ष लामाले जानकारी दिनुभयो ।
प्रतियोगितामा स्वदेशी तथा विदेशी गरी विभिन्न दशवटा टिमले भाग लिने पत्रकार सम्मेलनमा जानकारी दिइएको छ । हेटौंडा रिगल रिसोर्ट मकवानपुर, नेपाल आर्मी, एपीएफ क्लब, नेपाल पुलिस क्लब, जवलाखेल युथ क्लब, संकटा क्लब, मछिन्द्र क्लब, बागमती युवा क्लब सर्लाही, नवजनजागृति युवा क्लब सिमरा र अफ्रिकन रुट्स एसोसिएनले गोल्डकपमा भाग लिनेछन् ।
