हेटौंडाः यही फागुन २७ गतेदेखि हेटौंडामा स्थानीय तह सहिद स्मृति गोल्डकप फुटबल हुने भएको छ । मकवानपुर फुटबल संघको आयोजनामा हेटौंडाको वन विज्ञान क्याम्पसमा हुने प्रतियोगिताको फाइनल खेल चैत ७ गते हुनेछ । मकवानपुर जिल्ला फुटबल संघले आज हेटौंडामा पत्रकार सम्मेलनको आयोजना गरेर प्रतियोगिता बारे जानकारी गराएको छ ।
मकवानपुरका १० वटै स्थानीय तहको सहयोगमा हुन लागेको प्रतियोगिताको लागत ९४ लाख ४० हजार रुपैयाँ लागत अनुमान गरिएको छ । आयोजकसहित नेपालका ए डिभिजन क्लबको सहभागिता रहने प्रतियोगितामा १० वटा टिमको सहभागिता रहनेछ । प्रतियोगिताको विजेताले १० लाख रुपैयाँ, उपविजेताले पाँच लाख रुपैयाँसहित शिल्ड, मेडल तथा प्रमाणपत्र प्राप्त गर्ने प्रतियोगिताका संयोजक प्रताप विष्टले जानकारी दिनुभएको छ ।
प्रतियोगिताको उत्कृष्ट खेलाडीले ५० हजार रुपैयाँ नगद प्राप्त गर्नेछन् भने विधागत उत्कृष्ट खेलाडीले जनही २५ हजार रुपैयाँ र म्यान अफ द म्याचले १० हजार रुपैयाँ नगद प्राप्त गर्नेछ । आयोजक मकवानपुर जिल्ला फुटबल संघले आजै संघका सल्लाहकार तथा सहयोगीहरुसँग अन्तरक्रिया समेत गरेको छ ।
