हेटौंडाः नेपाल कम्युनिष्ट पार्टी (नेकपा) को दाहाल–नेपाल समूहको मकवानपुर जिल्ला अध्यक्षमा मुनु सिग्देल र सचिवमा प्रेमबहादुर पुलामीलाई जिम्मेवारी दिइएको छ । नेकपा दाहाल–नेपाल समूहले मकवानपुरसहित ६८ जिल्लामा अध्यक्ष र सचिवको टुंगो लगाएको छ । पार्टीमा विभाजन हुनुअघि पनि मकवानपुरमा पार्टीको अध्यक्षमा सिग्देल र सचिवमा पुलामी हुनुहुन्थ्यो । नेकपा ओली समूहले भने नेकपा मकवानपुरको अध्यक्षमा एकालाल श्रेष्ठ र सचिवमा लालबहादुर थापालाई चयन गरेको छ ।
फागुन १ र २ मा बसेको स्थायी कमिटी बैठकले जिल्ला अध्यक्ष र सचिवको नाम टुंगो लगाउने जिम्मा सचिवालयलाई दिएको थियो । त्यसैअनुसार फागुन ७ गते संगठनात्मक एकतासम्बन्धी आठ बुँदे मापदण्ड एवम् आधार तयार पारेको थियो । सामान्यतया पार्टी कमिटी तथा जनवर्गीय संगठनका विभिन्न तहमा पदाधिकारी तथा सदस्यहरुमा कमिटीको कूल सदस्य संख्यामा ५०/५० प्रतिशत हुनेगरी मापदण्ड बनाएको थियो । त्यसैअनुसार अध्यक्षद्वय पुष्पकमल दाहाल र माधवकुमार नेपालको संयुक्त हस्ताक्षरमा फागुन ७ मा जारी परिपत्रमा ६८ जिल्लाका अध्यक्ष र सचिव टुंगो लगाएका हुन् ।
बाँकी जिल्ला र अन्य पदाधिकारी भने अदालतको फैसलापछि टुंगो लगाउने तयारी यो समूहले गरेको छ । नेकपा विभाजनपछि ओली समूहमा लागेका नेताका पद अहिले रिक्त थिए । यसअघि दाहाल नेपाल समूहले पार्टी विभाजनलगत्तै प्रदेश इन्चार्ज भने तोकिसकेको छ ।
