हेटौंडाः बागमती प्रदेश लिग फुटबल प्रतियोगिता आज बिहीबारदेखि नुवाकोट जिल्लामा सुरु हुदैछ । बागमती प्रदेशको लिग फुटबल प्रतियोगितामा मकवानपुरबाट डाँफे युवा क्लबले सहभागिता जनाउँदै छ । अखिल नेपाल फुटबल संघ (एन्फा) को आयोजनामा हुन लागेको प्रतियोगितामा बागमती प्रदेशको मकवानपुरसहित १० जिल्लाको फुटबल टिमको सहभागिता रहने छ ।
खेल नुवाकोटको आदर्श बहुमुखी क्याम्पसको खेलमैदानमा बिहीबारबाट हुने मकवानपुर जिल्ला फुटबल संघका अध्यक्ष टिका लामाले जानकारी दिनुभएको छ । बागमती प्रदेशको १३ जिल्लामध्ये भक्तपुर, रसुवा र रामेछापले सहभागिता जनाएको छैन । लिगमा टिमहरुलाई ३ समुहमा विभाजन गरिएको छ । जसमा मकवानपुर समुह “सी” मा परेको छ । मकवानपुरले फाल्गुन ११ काभ्रेसँग प्रतिस्पर्धा गर्ने भएको छ ।
आज बिहीबार हुने उद्घाटन खेलमा नुवाकोटले सिन्धुलीसँग प्रतिस्पर्धा गर्नेछ । फागुन १४ गतेसम्म चल्ने प्रतियोगिताको विजेता टिमले नगद ५ लाखसहित शिल्ड, मेडल र प्रमाणपत्र प्राप्त गर्नेछन् भने उपविजेता टिमले नगद २ लाख ५० हजारसहित शिल्ड, मेडल र प्रमाणपत्र प्राप्त गर्नेछन् ।
