हेटौंडाः संघीय सरकारले कार्यान्वयन गर्न लागेको राष्ट्रपति शैक्षिक सुधार कार्यक्रममा मकवानपुर जिल्लाका ४९ विद्यालयले प्रस्ताव पेश गरेका छन् । बढीमा २५ लाख रुपैयाँ बजेट सीमामा रहेर विभिन्न ४ वटा क्षेत्रमा प्रस्ताव पेश गर्न आव्हान गरेअनुसार मकवानपुरका विद्यालयले पेश गरेको प्रस्ताव शिक्षा विकास तथा समन्वय इकाई मकवानपुरले शिक्षा विभागमा पठाएको छ ।
विद्यालयले भौतिक पूर्वाधार, सिकाई उपलब्धीको स्तरवृद्धि, नवीन प्रविधि÷नवप्रवर्तन÷सिकाई सामग्री व्यवस्थापन र प्राविधिक एवम् व्यावसायिक शिक्षामा पहूँच अभिवृद्धिसम्बन्धी प्रस्ताव पेश गर्न शिक्षा विभागले आव्हान गरेको हो । स्थानीय तहको सिफारिससहित विद्यालयले कुनै एक वा एक भन्दा बढी क्षेत्रमा प्रस्ताव पेश गर्न सक्ने व्यवस्थाअनुसार प्रस्तावहरु दर्ता भएको र ती प्रस्तावलाई विभागमा पठाइएको शिक्षा विकास तथा समन्वय इकाई मकवानपुरका निमित्त प्रमुख कृष्णप्रसाद पौडेलले जानकारी दिनुभएको छ ।
गत आर्थिक वर्षमा पनि संघीय सरकारले राष्ट्रपति शैक्षिक सुधार कार्यक्रम ल्याए पनि कोभिड–१९ संक्रमणको जोखिमका कारण सरकारले आव्हान गरेको लकडाउनका कारण प्रभावित बनेको थियो । गत वर्ष पेश भएका प्रस्तावहरु खारेज गरेर चालु आर्थिक वर्षमा नयाँ प्रस्ताव आव्हान गरिएको हो । शिक्षा विभागले माघ ५ गते सूचना प्रकाशित गरेर विद्यालयलाई प्रस्ताव पेश गर्न भनेको थियो । राष्ट्रपति शैक्षिक सुधार कार्यक्रम पहिलो पटक गत आर्थिक वर्षबाट सुरु गर्न खोजिए पनि लागू हुन नसकेकोले चालु आर्थिक वर्षमा पहिलो पटक कार्यान्वयनमा आउन लागेको हो ।
मकवानपुर जिल्लाका १० वटै पालिकाका विद्यालयले राष्ट्रपति शैक्षिक सुधार कार्यक्रमका लागि प्रस्ताव पेश गरेका छन् । मकवानपुरको हेटौंडा उपमहानगरपालिकाका १३ वटा विद्यालय, मनहरी गाउँपालिकाका ७ वटा विद्यालय, मकवानपुरगढी गाउँपालिकाका ५ वटा विद्यालय, थाहा नगरपालिका र ईन्द्रसरोवर गाउँपालिकाका ४/४ विद्यालय, कैलाश, भीमफेदी र बकैया गाउँपालिकाका ३/३ वटा विद्यालय र राक्सिराङ गाउँपालिकाका २ वटा विद्यालयले प्रस्ताव पेश गरेको शिक्षा विकास तथा समन्वय इकाई मकवानपुरका निमित्त प्रमुख कृष्णप्रसाद पौडेलले जानकारी दिनुभएको छ ।
