हेटौंडाः मदन भण्डारी स्वास्थ्य विज्ञान प्रतिष्ठान हेटौंडाले यसै वर्षदेखि तीनवटा शैक्षिक कार्यक्रम सञ्चालन गर्ने भएको छ । हेटौंडाको गौरीटार आइसोलेसन भएको भवनमा प्रतिष्ठानले चालु आर्थिक वर्षबाटै ब्याचलर अफ पब्लिक हेल्थ (बीपीएच), ब्याचलर अफ फार्मेसी र ब्याचलर अफ साइन्स इन मेडिकल ल्याबरोटरी टेक्निसियनको कक्षा सञ्चालन गर्ने तयारी गरेको हो ।
बागमती प्रदेश सरकारले सञ्चालनमा ल्याएको मदन भण्डारी स्वास्थ्य विज्ञान प्रतिष्ठानले स्वास्थ्यसम्बन्धी विभिन्न विषयको अध्यापनसँगै अन्य कामहरुलाई पनि सँगसँगै लैजाने तयारी गरिरहेको प्रतिष्ठानका रजिष्ट्रार राजेश प्रसाईंले जानकारी दिनुभयो । उहाँले चालु वर्षबाटै ३ वटा कोर्सहरु सञ्चालन गर्न थालिएको बताउनुभयो ।
हालको लागि बागमती प्रदेशको मदन भण्डारी स्वास्थ्य विज्ञान प्रतिष्ठानको आफ्नै भवन नभएका कारण गौरीटारको आइसोलेसन वार्ड रहेको भवनमा शैक्षिक कार्यक्रमहरु सञ्चालन गरिने जनाउनुभयो । प्रतिष्ठानको आफ्नै नाममा जग्गा प्राप्तिका लागि प्रक्रियामा गइसकेका कारण छिट्टै जग्गा प्राप्ति हुने भन्दै हालको लागि गौरीटार आइसोलसन वार्डमा शैक्षिक कार्यक्रम सञ्चालन गरिने उहाँको भनाई छ ।
प्रतिष्ठानले अहिले ३ वटा कोर्स सञ्चालन गर्न सम्बन्धित विषयका ३ जना सह–प्राध्यापक र ६ जना लेक्चररको माग गरेको छ । यस्तै रिसर्च कोअर्डिनेटर एक जनाको लागि विज्ञापन गरेको छ । प्रतिष्ठानका रजिष्ट्रार प्रसाईंका अनुसार बागमती प्रदेश लोकसेवा आयोगले उनीहरुको पदपूर्ति गर्नेछ । प्रतिष्ठानले अध्यापन सुरु गर्ने तीनवटा कोर्सका लागि हाललाई सम्बन्धित विषयको ३ जना सह–प्राध्यापक र २/२ जना लेक्चरर माग गरिएको उहाँले जानकारी दिनुभयो ।
पहिलो वर्षका लागि प्रतिष्ठानले प्रत्येक कोर्सका लागि ४० जना विद्यार्थी भर्ना गरी अध्यापन गर्ने लक्ष्य राखेको उहाँले बताउनुभयो । प्रतिष्ठानले निजी क्याम्पसहरुको तुलनामा निकै सस्तो शुल्कमा कोर्स सञ्चालन गर्ने उहाँले जानकारी दिनुभयो । यद्यपि बागमती प्रदेश सरकारले ३ वटै कोर्सहरुको शुल्क भने तोकेको छैन । प्रदेश सरकारले शुल्क निर्धारण गरेपछि लागू हुने उहाँको भनाई छ ।
चालु वर्षभित्रै संञ्चालन हुने ३ वटै कोर्सहरुमा छात्रवृत्तिलगायत छुटको व्यवस्था प्रदेश सरकारको नियमअनुसार हुने उहाँले बताउनुभयो । प्रतिष्ठानले आगामी वर्षहरुमा नर्सिङ, एमबीबीएस विषयका कक्षा पनि सञ्चालन गर्ने रजिष्ट्रार प्रसाईंले जानकारी दिनुभयो । आफ्नो ४ वर्षको कार्यकालमा राजनीतिक स्थायित्व कायम भएर काम गर्ने वातावरण स्वच्छ भएमा प्रतिष्ठानका गतिविधिहरु धेरै अगाडि बढ्ने उहाँले बताउनुभयो ।
हेटौंडाका बासिन्दाहरुका लागि मदन भण्डारी स्वास्थ्य विज्ञान प्रतिष्ठान स्थापना हुनु गौरवको कुरा भएको भन्दै प्रतिष्ठानले हेटौंडाको स्वास्थ्य क्षेत्रमा कायापलट गरिदिने उहाँले बताउनुभयो । उहाँले प्रतिष्ठानले तिव्र गतिमा काम गरेमा ४ वर्षमै स्वास्थ्य क्षेत्रमा उल्लेखनीय सुधार गर्न सकिने तथा प्रदेशका लागि आवश्यक प्राविधिक जनशक्तिहरुको पनि उपलब्धता गराउन प्रतिष्ठान सफल हुने उहाँले बताउनुभयो ।
