हेटौंडाः हेटौंडा–४ स्थित आधुनिक राष्ट्रिय माविका प्रधानाध्यापक वीरवंश बैठा एसियाकै उत्कृष्ट प्रधानाध्यापक चुनिनु भएको छ । मलेसियास्थित एसिया अवार्ड नामक संस्थाले आधुनिक राष्ट्रिय माविका प्रधानाध्यापक वीरवंश बैठालाई सन् २०२०/२१ को एसियाकै उत्कृष्ट प्रधानाध्यापकको रुपमा छनोट गरेको हो ।
विभिन्न व्यावसायिक विधामा उत्कृष्ट घोषणा गर्ने एसिया अवार्डले करिब दुई महिनाअघि आवेदन माग गरेको थियो । एसिया अवार्डको छनोट प्रक्रियामा विद्यालयको विवरण र आफ्नो व्यक्तिगत विवरण बुझाएर प्रधानाध्यापक बैठा एसियाका एक सय आवेदक मध्येबाट उत्कृष्ट ठहरिनुभएको हो ।
एसिया अवार्डले बैठालाई शनिबार उत्कृष्ट प्रधानाध्यापकको रुपमा घोषित गरेको हो । एसिया अवार्डले प्रधानाध्यापक बैठालाई आगामी अप्रिल ७ मा भारतको मधुराईमा आयोजना गरिने समारोहमा सम्मान गर्नेछ । एसिया अवार्डमा आफूले विद्यालयको वस्तुस्थिति र आफ्नो योजनाका बारेमा जानकारी गराएको प्रधानाध्यापक बैठाले बताउनुभयो । दश जोड दुई तहसम्म पठनपाठन हुने आधुनिक राष्ट्रिय माविमा दुई हजार पाँच सय विद्याथर्थी अध्ययनरत छन् । नेपाली र अंग्रेजी दुबै माध्यममा पठनपाठन हुने विद्यालय जिल्लामा सधै पहिलो स्थानमा रहँदै आएको छ भने देशकै नमूना सामुदायिक विद्यालयको रुपमा पनि परिचित छ ।
२०४१ सालमा निमावि तहको शिक्षकको रुपमा नियुक्त हुनुभएका बैठा २०५१ सालदेखि आधुनिक राष्ट्रिय माविमा शिक्षण गर्दै आउनुभएको छ । २०५८ सालदेखि करिब तीन वर्ष काजमा श्रोतव्यक्तिको रुपमा काम गर्नुभएका बैठा २०७० सालदेखि आधुनिक राष्ट्रिय माविको सहायक प्रधानाध्यापकको रुपमा कार्यरत हुनुहुन्छ । बैठाले २०७४ साल फागुनदेखि आधुनिक राष्ट्रिय माविको प्रधानाध्यापकको भूमिकामा हुनुहुन्छ ।
इन्टरनेशनल प्रिन्सीपल फोरम, टिचिङ एण्ड एजुकेशन रिसर्च एसोसिएसनमा समेत आवद्ध बैठा राष्ट्रिय तथा अन्तर्राष्ट्रिय सम्मेलनमा सहभागी भएर विद्यालय व्यवस्थापन र विद्यालयको नेतृत्व सीपका बारेमा ज्ञान हासिल गरेको बताउनुहुन्छ ।
