हेटौंडाः नेपाल स्काउट बाग्मती प्रदेशको आयोजनामा हेटौंडा ओपन स्काउट क्रयू मकवानपुरले ‘एसएमएस’ (सामाजिक दुरी, मास्क, हातको सफाई) अभियानको हेटौंडा उपमहानगरपालिकाका मेयर हरिबहादुर महतले शुभारम्भ गर्नुभएको छ । नेपाल सरकार स्वास्थ्य तथा जनसंख्या मन्त्रालय, हिसान तथा यूनिसेफ नेपालसँगको सहकार्यमा नेपाल स्काउटले ७ वटै प्रदेशमा ६ महिने एसएमए अभियान सञ्चालन गर्ने क्रममा बागमती प्रदेशको राजधानी हेटौंडामा अभियान सुरु गरिएको हो ।
३ चरणमा सञ्चालन हुने अभियानअन्तर्गत् पहिलो चरणमा कोरोना महामारीबाट आफू सुरक्षित हुन सही तरिकाले मास्क लगाउने र लगाउन सिकाउने, सामाजिक दुरी कायम गर्ने र समय–समयमा स्यानिटाइजर प्रयोग गरी सुरक्षित हुने कार्यक्रम गरिनेछ । अभियानको दोस्रो चरणमा पर्चा पम्प्लेट तथा जिंगलबाट कोरोना महामारीबारे जनचेतना जगाउने र ब्यवहार परिवर्तन गराउन सहयोग गर्ने कार्यक्रम तय गरिएको छ । यस्तै, तेस्रो चरणमा उच्च जोखिममा रहेका रोगी, अपाड्डता भएका व्यक्ति, बृद्घबृद्घा, बालबालिकालाई समेटेर एसएमएसको महत्व र प्रभावकारिताबारे छलफल गर्ने र त्यसको उपयोगिताबारे सचेतना जगाउँदै कार्यक्रम समापन गरिनेछ ।
बजारको मुख्य व्यापारिक केन्द्र, बसपार्क क्षेत्र, पसलजस्ता मानिसहरुको घुइँचो बढी हुने र कोरोना संक्रमणको जोखिम बढी स्थानमा मकवानपुरका २० जना रोभर रेन्जर र स्काउट लिडरहरु दैनिकरुपमा खटिएर अभियान सञ्चालन गरिने रोभर लिडर अशोक सारु मगरले जानकारी दिनुभयो ।
