हेटौंडाः अन्तर्राष्ट्रिय बाल अधिकार दिवसको दिन शुक्रबार मानव अधिकार संरक्षण तथा मानव बेचबिखन विरुद्धको सञ्जाल मकवानपुरले जिल्ला प्रहरी कार्यालय मकवानपुरमा ज्ञापनपत्र बुझाएको छ । बिहीबार मकवानपुरको बागमती गाउँपालिका–७ मा बलात्कारपछि ढुङ्गाले किचेर ४ वर्षीया बालिकाको हत्यामा संलग्नलाई कारवाहीको माग गर्दै अधिकारवादीहरुको एक समूहले प्रहरीलाई ज्ञापनपत्र बुझाएको हो ।
प्रहरीले घटनामा संलग्न १६ वर्षीय एक किशोरलाई पक्राउ गरेको छ । पक्राउ परेका किशोरलाई प्रहरीले मकवानपुर जिल्ला अदालतबाट ४ दिन हिरासतमा राखेर अनुसन्धान गर्न अनुमति लिएको छ । ज्ञापनपत्र बुझ्नुहुँदै मकवानपुर प्रहरी प्रमुख प्रहरी उपरीक्षक सुशील सिंह राठौरले प्रहरीले घटनाको अनुसन्धान गरी दोषीलाई कारवाही गर्ने प्रतिवद्धता व्यक्त गर्नुभएको छ ।
पक्राउ परेका किशोरले अपराध गरेको स्वीकारिसकेको जानकारी गराउनुहुँदै प्रहरी प्रमुख राठौरले नागरिक समाजको तर्फबाट खबरदारीलाई सकारात्मक रुपमा लिई अपराधीलाई कानुनसम्मत सजाय दिलाउन प्रहरीले आवश्यक जिम्मेवारी निर्वाह गर्ने बताउनुभएको छ ।
