हेटौंडाः संसारकै अग्रणी हवाई सेवा प्रदायक कतार एयरवेजले विश्व शिक्षक दिवसको अवसरमा आव्हान गरेको प्याकेजमा हेटौंडास्थित आधुनिक राष्ट्रिय माविका प्रधानाध्यापक वीरवंश बैठा र शिक्षक सुरज बुढाथोकीलाई एकतर्फी निशूल्क हवाई टिकट प्राप्त भएको छ । अक्टोबर ५ का दिन विश्व शिक्षक दिवसको अवसरमा कतार एयरवेजले संसारभरका २१ हजार शिक्षकलाई एकतर्फी निशूल्क हवाई टिकट प्रदान गर्ने गरी हवाई टिकटका लागि आवेदन दिन आव्हान गरिएको थियो ।
एयरवेजको आह्वानबमोजिम इजिप्टको टिकट प्राप्त गर्न प्रस्ताव गरेको प्रधानाध्यापक बैठाले बताउनुभएको छ । आफूले एकतर्फी निशूल्क हवाई टिकटका लागि प्रस्ताव पेश गर्नुका साथै विद्यालयका सबै शिक्षकलाई पनि जानकारी गराएको बैठाले बताउनुभएको छ । सोही क्रममा शिक्षक सुरज बुढाथोकीलाई पनि एकतर्फी टिकट प्राप्त भएको उहाँले जानकारी दिनुभएको छ । बैठाले आगामी बैशाख महिनामा इजिप्ट जाने प्रस्ताव गरेको बताउनुभएको छ । इजिप्टको दुईतर्फी हवाईभाडा ८० हजार रुपैयाँमध्ये एकतर्फी भाडा छुट हुँदा ४० हजार रुपैयाँ छुट हुने उहाँले बताउनुभएको छ ।
